Një “shtëpi bari” e zbuluar nga autoritetet greke, ka çuar pas hekurave tre shqiptarë në Athinë, të cilët akuzohen për trafik droge dhe llogari bankare të pajustifikuara në Britaninë e Madhe dhe në Shqipëri.
Përgjegjës për sigurimin e mjeteve të nevojshme për kultivimin e kanabisit ishte një 44-vjeçar shqiptar, ndërsa një 52-vjeçar luante rolin e ‘kopshtarit’ dhe kujdesej për kultivimin e bimëve, si dhe për përgatitjen për shitje të lëndës narkotike.
Sipas Zougla.gr ai nuk dilte nga “shtëpia e barit” dhe e vetmja gjë që bënte ishte kujdesia ndaj fidanëve.
Ndërkohë, një 56-vjeçar dyshohet se ishte kreu i bandës dhe policia i ka gjetur llogari bankare në Shqipëri dhe Britani.
Gjatë kontrollit fizik në laborator, policia greke ka gjetur dhe sekuestruar: 310 fidanë kërpi hidroponik, 42 kg kanabis, 6- kg poleni kërpie, peshore elektronike, pajisje speciale për rritjen e kanabisit, vulë me emrin e kompanisë, enë plastike, tenxhere dhe llamba.
Ndërsa në banesat e tyre në Athinë dhe Nikia u gjetën dhe sekuestruan: 4 gr kokainë, 89 gr kanabisi, 8 celularë dhe mjete të ndryshme transporti.
Tre të arrestuarit ndodhen në paraburgimin e Pireut ku presin të marrin dënimet përkatëse nga drejtësia greke.
