Gjykata e Tiranës ka caktuar masën e sigurisë “arrest në burg” për Armando Papën nga Fushë-Kuqja e Kurbinit, i cili u kap me 41 kg e 700 gram heroinë dy ditë më parë.
Mësohet se 31-vjeçari deklaroi se nuk ishte në dijeni për 62 pakot me heroinë dhe para togave të zeza ka pretenduar se dikush ia ka futur me qëllim në makinë.
Papa është shprehur se po shkonte në Rinas për të dërguar një porosi të së motrës, ndërsa avokati i tij ka kërkuar t’i bëhet ekspertiza lëndës narkotike, duke kërkuar “burg me afat” me pretendimin se vuan nga epilepsia.
“Kisha marrë një porosi nga motra t’ia çoja në Rinas. Mi futën në makinë dhe më thanë “ik”. Kurohem në mënyrë të vazhdueshme, pasi vuaj nga epilepsia. Ngarkesën ma kanë futur në makinë pranë mbikalimit të Rinasit, më kanë ngatërruar”, tregoi 31-vjeçari.
Operacioni për kapjen e Papës, sakaq është kryer nga specialistët e Seksionit kundër Narkotikëve në Drejtorinë e Përgjithshme të policisë, në bazë të informacioneve rreth ngarkesës së drogës, që ishte mbajtur nën vëzhgim.
Droga transportohej me një automjet tip “Benz”, që drejtohej nga Armando Papa. Ngarkesa me heroinë i është dorëzuar Papës nga një person tjetër, i identifikuar si Roland Guzi, që kishte rolin e transportuesit, dhe është shpallur në kërkim nga policia.
Kjo e fundit, vendosi të mos ndërhynte deri në momentin e dorëzimit të ngarkesës, dhe në këto rrethana, ky shtetas, emrin e të cilit autoritetet e mbajnë të fshehtë, ka arritur të largohet. Ka dyshime se droga vinte nga Turqia dhe porositës i saj të jetë një eksponent i njohur i trafikut të narkotikëve në zonën e Kurbinit.
Droga me vlerë mbi gjysmë milion euro, është sekuestruar nga policia në cilësinë e provës materiale.
NJOFTIMI:
Finalizohet me sukses megaoperacioni policor i koduar “Fusha e kuqe”, nga Seksioni për Hetimin e Narkotikëve në DVP Tiranë.
Operacioni bazuar në inteligjencën informative për goditen e veprimtarisë kriminale në fushën e drogave të forta.
Vihet në pranga drejtuesi i automjetit që transportone heroninën.
Shpallet në kërkim bashkëpunëtori i tij.
Specialistët e Seksionit të Hetimit të Narkotikëve, në vijim të operacioneve për goditjen e veprimtarive kriminale në fushën e narkotikëve, bazuar dhe në informacionet e siguruara përmes inteligjencës informative se një sasi e madhe lënde narkotike heroinë po transportohej me një automjet tip “Benz”, kanë organizuar dhe finalizuar operacionin policor të koduar “Fusha e kuqe”.
Si rezultat i këtij megaoperacioni, u arrestua në flagrancë shtetasi A. P., 31 vjeç, banues në Fushë Kuqe, Kurbin.
Gjithashtu, u shpall në kërkim bashkëpunëtori i tij, shtetasi R. G., banues në Sukth.
Shërbimet e Policisë, bazuar në informacionet e marra në rrugë operative, kanë lokalizuar automjetin e dyshuar dhe janë vënë në ndjekje të tij, pasi kanë vijuar ndjekjen, në afërsi të rrethrrotullimit të aeroportit, kanë bërë ndalimin e automjetit të dyshuar.
Gjatë kontrollit në automjetin tip “Benz”, u gjet në bagazh një kuti me 62 pako brenda së cilave kishte 41 kg e 700 gram lëndë të dyshuar narkotike heroinë, të cilat u sekuestruan në cilësinë e provës materiale së bashku me automjetin dhe 1 mjet prerës.
Nga specialistët për hetimin e Narkotikëve në Drejtorinë Vendore të Policisë Tiranë, në bashkëpunim me Prokurorinë e Rrethit Gjyqësor Tiranë, vijojnë hetimet e thelluara për identifikimin e shtetasve të tjerë të implikuar në këtë veprimtari kriminale”, thuhet në njoftimin e policisë.
