Nga Boldnews.al
Artan Gaçi, një ish-deputet i Partisë Socialiste, është shpallur një vit më parë Investitor Strategjik në një nga zonat më të bukura të Shqipërisë, Dhërmi. Ish-deputeti është njëherësh edhe bashkëshorti i ministres se Jashtme, Olta Xhaçka, ndërkohë që ka konflikt të pastër interesi.
Përpos diskutimeve politike për përfitimet e firmës së Gaçit dhe familjarëve të Xhaçkës, mazhoranca “nuk e ka vënë ujin në zjarr”, teksa ka vijuar që të favorizojë këtë çift, duke iu bërë edhe një ujësjellës me shpejtësinë më të madhe.
Pra nga njëra anë ata përfitojnë me taksën 1 euro mijëra metra katrorë në bregdet, dhe nga ana tjetër shteti iu bën të gjitha punimet rreth e përqark, duke shpenzuar miliona euro.
Sipas dokumenteve që disponon redaksia e BoldNews.al, Agjencia Kombëtare e Ujësjellës Kanalizimeve dhe Infrastrukturës së Mbetjes ka hapur një procedurë tenderimi për ndërtimin e një ujësjellësi në jug të Shqipërisë. Ky autoritet është në varësinë direkte të Ministrisë së Infrastrukturës dhe Energjisë, ndërkohë që objekti i këtij tenderi është “furnizimi me ujë të zonave bregdetare, zonat e investimit strategjik, Draleos, Drimadhed dhe Dhërmi, Faza e parë”.
Pra, zonat ku operojnë të “favorizuarit” e qeverisë, të cilëve iu është dhënë një pronë shtetërore në bregdet me vlerën e 1 eurove. Veprime qesharake të shtetit shqiptar, i cili humb nga të dyja anët, duke favorizuar këto kompani. Qeveria nuk i ka paratë e veta, ato janë të shqiptarëve që paguajnë taksa, që nuk shkojnë për ta, po për një grusht njerëzish me lidhje të forta deri sipër në qeveri. Në të njëjtin dokument shkruhet se fondi limit i të gjithë kësaj procedure është plot 743.232.358 lekë. Plot 7 milionë euro, vetëm e vetëm që këta investitorë të vijojnë të qetë punimet. Por, tenderat për ta do të vijojnë për linjat elektrike, për kanalizimet e ujërave të zeza, për rrugë, gjelbërim e madje edhe pastrimin e komplekseve dhe fshatrave të tyre të pasur me paratë e shqiptarëve të varfër.
Vitin e kaluar, Këshilli i Ministrave shpalli vendimin për dhënien në përdorim të një zone bregdetare në Dhërmi për një periudhë 30-vjeçare në favor të kompanisë ‘AGTÇ Hotel Management’. Kompania ‘AGTÇ Hotel Management’ është në pronësi të Tawni Lin Grzych-Sutton, një 31-vjeçare e lindur në Masaçusets të Shteteve të Bashkuara. Sutton është gjithashtu partnerja prej shumë vitesh e Andi Xhaçkës – vëllai i ministres për Evropën dhe Punët e Jashtme.
Kompania e Sutton e fitoi të drejtën e përdorimit të tokës në bregdet nëpërmjet një marrëveshje me kompaninë AG.TÇ Sh.p.k – në pronësi 100% të Artan Gaçit, ish-deputet socialist dhe njëkohësisht bashkëshort i ministres Xhaçka. Kompania e Gaçit ka marrë statusin ‘investitor strategjik’ për ndërtimin e një hoteli me pesë yje dhe me kapacitet prej 106 suitash në Dhërmi, të quajtur “Dreamades Luxury Suites”, ndërsa vendimi i Këshillit të Ministrave i hapi rrugën e përdorimit afatgjatë të brigjeve të detit dhe plazhit përballë hotelit të tij.
Vitin e kaluar, Gaçi i tha BIRN më 3 mars se për të shmangur konfliktin e interesit, ‘kishte gjetur një kompani amerikane me përvojë për të menaxhuar investimin dhe plazhin’. Më 15 korrik 2021, Komiteti i Investimeve Strategjike i kryesuar nga kryeministri Edi Rama e miratoi kërkesën dhe i njohu kompanisë së sapokrijuar nga Sutton masën mbështetëse të lejimit të përdorimit të brigjeve të detit si dhe zonën përkatëse të plazhit përballë kompleksit për një afat 30-vjeçar. Në dy vendimet e Komitetit të Investimeve Strategjike përcaktohen edhe lehtësi të tjera për dy kompanitë në pronësi të familjarëve të afërt të ministres Xhaçka, të tilla si asistencë dhe procedurë e përshpejtuar për çdo akt administrativ, funksionimin e shërbimeve mbështetëse të furnizimit me ujë, lidhjen në rrjetin elektrik, kanalizimet e ujërave dhe infrastrukturë rrugore për objektin.
Dhe një nga këto benefite, për ndërtimin e Ujësjellësit, qeveria po shpenzon plot 7 milionë euro!
