Superliga e basketbol lit të meshkujve ka zhvilluar dje dy ndeshje të vlefshme për javën e 20-të, javë që shënon fundin e sezonit të rregullt. Kamza mundi në fushën e saj Besëlidhjen kryesuese, ndërsa Tirana fitoi në transfertë kundër Apolonisë, takime këto që kishin vetëm vlerë statistikore, duke qenë se verdiktet tashmë janë dhënë, si për zonën “play off”, gjithashtu edhe për “play out”-in.
KAMZA-BESËLIDHJA – Kamza nuk ka falur në shtëpi, teksa ka marrë një fitore me 9 pikë diferencë ndaj kryesuesve të kampionatit. Skuadra e Eni Llazanit triumfoi me rezultatin 96-87 (26-16, 25-17, 22-22, 23-32) në takimin e luajtur në Bathore.
Pas një epërsie të lehtë të lezhjanëve në minutat e para, Kamza nisi të dominojë, teksa dhuron edhe spektakël në parket, duke krijuar shkëputjen, për ta çuar deri në +26 pikë avantazhin në periodën e tretë.
Me gjithë përpjekjet e Besëlidhjes, që arrin të afrohet deri në 8 pikë në periodën e fundit, Kamza e ruan epërsinë deri në fund, duke dalë me fitore.
Gray me 30 pikë, Thano me 27 pikë e 12 ribaunde, Thomas me 21 pikë e 10 ribaunde si dhe Bowers me 12 pikë e 12 ribaunde, udhëhoqën Kamzën në suksesin ndaj kryesuesve. Ndërsa për lezhjanët më i miri ishte Robinson, autor i 38 pikëve dhe 12 ribaundeve.
Kështu Kamza dhe Besëlidhja e mbyllin sezonin e rregullt me nga 2 fitore secila në përballjet direkte, me lezhjanët që mbetet të parët, ndërsa kamzalinjtë të katërtit, që do të thotë se do të sfidohen sërish në gjysmëfinalet e “play off”-it.
APOLONIA-TIRANA – Bardheblutë e Erkand Karajit e përfunduan sezonin e rregullt duke marrë një fitore në transfertë kundër Apolonisë në shifrat 67-90 (19-22, 21-23, 17-20, 10-25). Tirana ishte superiore në të katërta periodat, ndërsa fierakët duken më të fokusuar te sfidat “play out”.
Hamati me 21 pikë, 11 asiste dhe 7 ribaunde si dhe Hysenagolli me 22 pikë e 10 ribaunde udhëhoqën edhe një herë tjetër Tiranën. Kjo ishte fitorja e 12-të në kampionat për bardheblutë, të cilët e përfundojnë në vend të tretë, ndërsa në “play off” do të sfidojnë Teutën.
Ndërkohë, Apolonia do të masë forcat në “play out” me Partizanin. Java e 20-të do të mbyllet sot me takimin Vllaznia-Teuta.
