Na ndajnë vetëm 45 ditë nga zhvillimi i zgjedhjeve lokale të 14 majit në vend dhe në një kohë kur nga qeveria shprehen se do të fitojnë më shumë se 40 bashki, duket se qytetarët nuk mendojnë njësoj.
Formalizimin e procesit të blerjes së votës nga Edi Rama, duke vendosur nën kthetra pensionistët me shpërblimin 5 mijë lekë të reja dhe makinacionet me rritje pagash në shkelje të Kodit Zgjedhor, duket se janë të ndikuara nga pakënaqësia në rritje ndaj mënyrës si po qeveriset vendi.
Vetëm në një sondazh të publikuar këtë të enjte në emisionin “Top Story” në TCH, 54.8% e shqiptarëve i janë përgjigjur pyetjes: “Si jetohet sot në Shqipëri”, me përgjigjet keq dhe shumë keq.
Ndërkohë, 43.1% e qytetarëve mendojnë se në vendin tonë jetohet mirë dhe vetëm 2.1%, janë përgjigjur me shumë mkirë.
Sondazhi është kryer në bashkëpunim me kompamninë “Angi Richerce”, dhe drejtori i saj Fabio Biçari ka shpjeguar metodologjinë e sondazhit, duke nënvizuar se personat që nuk janë përgjigur, nuk janë bërë pjesë.
“Atëherë të dhënat që shikoni është sepse ata persona që nuk na kanë dhënë një përgjigje nuk janë futur. Kemi futur vetëm ata që kanë dhënë një përgjigje. Ajo që neve na intereson është ai që është përgjigjur dhe si. Mos ta fusim në këtë përqindje”, tha ai.
Kjo tregon se një pjesë e shqiptarëve refuzojnë të shprehen për gjendjen në të cilën ndodhen.
Ndërkohë që një pjesë e madhe e shqiptarëve, kryesisht të rinj kanë braktisur vendin për një jetë më të mirë në një vend të BE-së, me pandeminë e shpopullimit që vijon prej 10 vitesh me ritme të frikshme.
Të dhënat zyrtare tregojnë se, çdo vit në mënyrë sistematike emigracioni neto ka qenë më bilanc negativ, përkundër pritshmërive se, flukset e emigracionit do të stablizoheshin në dekadën e tretë të tranzicionit.
Sipas të dhënave të INSTAT popullsia nga të dhënat e censusit 2011 ishte 2,831,741 persona, teksa me të dhënat e emigracionit neto kanë ikur nga vendi 213,748 persona ose 7.5 % e popullsisë që u numërua me 2011.
Në vitin 2021 u regjistrua dhe niveli më i lartë i të larguarve neto nga vendi në një dekadë, me gati 33 mijë persona që ikën pa kthim. Ritmet e ikjes u përshpejtuan ndjeshëm pas frenimin në periudhën e pandemisë, në 2020-n.
