Shqipëria është tronditur mbrëmjen e sotme nga një ngjarje e rëndë e ndodhur në Kavajë, ku sherri banal midis dy 43-vjeçarëve në një lokal ka degjeneruar në përdorimin e thikës dhe armës, me dy protagonistët që ndërruan jetë në spital.
Por një ngjarje më sfond të ngjashëm raportohet nga mediat se ka ndodhur thuajse në të njëjtën orë edhe në qytetin e Elbasanit.
Sipas mediave Sali Hajdari është plagosur me thikë gjatë një sherri, ku 33-vjeçari është goditur me thikë në zemër dhe pak minuta pasi u dërgua në spital ka ndërruar jetë.
Por përpos raportimit për një sherr me tij dhe një të riu që ka agravuar në përdorimin e thikës, policia ka dhënë një tjetër version për ngjarjen.
Sipas uniformave blu 33-vjeçcari vuan nga problem të shëndetit mendor dhe është vetëplagosur me thikë.
Policia njofton se ai është dërguar me shenja jete në spitalin e qytetit, por ka ndërruar jetë pak minuta pasi mbërriti aty.
“Rreth orës 19.00, në lagjen “Dyli Haxhire”, shtetasi Sali Hajdari 33 vjeç, dyshohet se ka plagosur veten me thikë dhe si pasojë e plagës ka humbur jetën në spital. Nga veprimet e para hetimore rezulton se 33-vjeçari dyshohet se vuante nga probleme të shëndetit mendor dhe ka dëmtuar veten me thikë në zemër”, njofton policia.
Ndërkohë, grupi hetimor po punon për sqarimin e plotë të rrethanave të ngjarjes.
