Sherri që përfundoi me dy viktima në Kavajë dyshohet se ka nisur me fjalët “pse më sheh, kush je ti” dhe ishte derivat i një konflikti të ndodhur tre ditë më parë mes Edmond Gosës dhe Altin Rexhës.
Sipas dëshmisë për mediat, të një banori të zonës që i njihte të dy viktimat, ata ishin konfliktuar disa ditë më parë për arsye banale të tipit ‘pse më sheh’.
“Probleme nuk kanë pasur, sherr koti, pse hap sytë. S’kanë arritur ta mbyllin. Ai ishte me fëmijën përdore, janë të ardhur. Ishin duke folur, i pashë, pa ikur unë dëgjoj krisma, ky tjetri me thikë, një u shtri aty një këtej.
Kavajasi pati thikë, e vrau me thikë, ai me pistoletë. E kishte me vete se kishin pasur konflikt edhe më herët. Ky kavajasi ishte shumë i fuqishëm, e mbyti”, tregoi nje tjeter deshmitar.
Altin Rexha nga Kukësi në momentin që u konfliktua me Gosën kishte djalin e mitur kapur prej dore pasi ndodhej jo shumë larg banesës së tij.
Ai kishte dalë të takonte Gosën për të sqaruar përplasjet e tyre, ndërsa 43-vjeçari i nguli thikën pas shpine.
Mësohet se të dy fillimisht janë konfliktuar verbalisht e më pas situata ka degraduar në dhunë fizike e më pas te përdorimi i armëve të cilat i morën jetën të dyve, ku Gosa e ka qëlluar me thikë Rexhën, i cili është përgjigjur dukë shtënë me armë mbi 3 herë drejt 43-vjeçarit.
Konflikti ka ndodhur në një nga zonat më të populluara të qytetit, ndërsa mësohet se para 3 ditësh për motive të dobëta në një lokal të qytetit, Rexha dhe Gosa janë konfrontuar edhe fizikisht.
Të dy viktimat kishin ndryshuar emrin në gjendjen civile, ku Gosa dyshohet se ka pasur precedentë të mëparshëm penalë dhe njihej si Armando, ndërsa Rexha kishte ndryshuar emrin në Sali.
