Gjykata e Posaçme e Apelit rrëzoi kërkesën e deputetit Arben Ahmetaj, në lidhje me animimin e bërë për kontrollin e vilës në pronësi të partneres së tij, te Gjiri i Lalzit (Hamallaj), më 9 mars.
Kontrolli nga agjentë të BKH-së erdhi pas një vendimi të Gjykatës së Posaçme më 8 Mars, në vazhdën e hetimeve që po zhvillohen ndaj Ahmetajt për çështjen e inceneratorëve.
Në kërkesën e depozituar në Apel, mbrojtësit ligjore të ish-zëvendëskryeministrit kërkuan që vendimi i shkallës së parë të rrëzohet si një akt i paligjshëm që “cënon sovranitetin e Kuvendit, Kushtetutës dhe Kodit të Procedurës Penale”. Po ashtu, u kërkua konstatimi i paligjshmërisë së kontrollit te banesës në pronësi të bashkëjetueses së Ahmetajt, “për shkak të mungesës së shkaqeve të ligjshme për kryerjen e tij dhe për mungese arsyetimi të lidhjes mes provave për kryerjen e faktit penal dhe sendeve që synohej te gjendeshin ne banese”.
Në ankim pretendohet se edhe modaliteti i ekzekutimit te kontrollit personal ka qenë i paligjshëm. Sipas mbrojtjes, “ka cënuar dinjitetin njerëzor të bashkëjetueses së Ahmetajt, të drejtën e mbrojtjes ligjore të çiftit bashkëjetues dhe privatësinë e komunikimeve elektronike”.
Megjithatë, gjyqtari Dhimitër Lara vendosi rrëzimin e ankimit.
Vila nën sekuestro
Ankimi i Ahmetajt pasoi me vendosjen e masës së sekuestros nga GJKKO – me kërkesë të SPAK, të vilës te Gjiri i Lalzit dhe e një tjetre në Palasë. Rezidenca e fundit, sipas dyshimeve të prokurorisë, i përket ish-bashkëshortes së Ahmetajt.
SPAK po heton Ahmetajn për të paktën 4 vepra penale, nga mos deklarimi apo fshehja e deklarim i rremë i pasurive, te korrupsioni pasiv i funksionarëve të lartë, pastrimi i parave dhe shpërdorimi i detyrës. Kjo e fundit lidhet me hetimet në rastin e inceneratorëve, për të cilën ish zëvendëskryeministri ka këmbëngulur se nuk është i përfshirë.
