Prokuroria e Tiranës ka kërkuar 3 vite burg për Fatjon Muratin. Bëhet fjalë për pronarin e lokalit në “Don Bosko” që u qëllua me breshëri automatike dy javë më parë, ku u vra banakierja dhe u plagosën gjashtë të tjerë, mes të cilëve një e mitur.
Sipas Prokurorisë, Murati duhet të fajësohet për “mbajtja pa leje dhe prodhimi i armëve, armëve shpërthyese dhe municionit” në banesë.
Bëhet fjalë për dosjen lidhur me arsenalin e armëve të gjetur në dy banesa në Tiranë.
Ishte pikërisht një gjurmë gishti në një valixhe që u gjet në banesën e Kristian Gjinit, prova që çoi në arrestimin e Fatjon Muartit disa muaj më parë.
Më pas, ai u lirua nga gjykata e Tiranës që caktoi ndaj tij masën e arrestit shtëpiak, duke argumentuar prokuroria s’kishte arritur të gjente asnjë provë tjetër që të implikonte Muratin, veç gjurmës së gishtit.
Fatjon Murati është marrë në pyetje dhe për masakrën e ndodhur në Fushë-Krujë, ku u vranë tre persona, mes tyre Brilant Martinaj, kushëri i Ervis Martinajt.
