Bashkimi Evropian shpreh keqardhjen që Lista Serbe, Partia më e madhe e serbëve në Kosovë, nuk e ka shfrytëzuar të drejtën demokratike për të marrë pjesë në zgjedhjet e jashtëzakonshme në komunat në veri të Kosovës.
Zgjedhjet do të mbahen më 23 prill, pas shtyrjes në dhjetor të vitit të kaluar, me kërkesë të bashkësisë ndërkombëtare.
“Zgjedhjet janë gur themeli i demokracisë dhe BE-ja gjithmonë e ka theksuar rëndësinë e gjithpërfshirjes”, u shpreh Stano për Radion Evropa e Lirë, duke theksuar rëndësinë që zgjedhjet të mbahen në kushte paqësore.
Sipas njohësve të çështjeve politike, mospjesëmarrja e partisë më të madhe të serbëve në Kosovë në këto zgjedhje, e rrezikon mbarëvajtjen e gjithë procesit.
Lista Serbe, e cila e gëzon mbështetjen e Beogradit zyrtar vendosi dy kushte për të ndryshuar qëndrim: formimin e Asociacionit të komunave me shumicë serbe dhe tërheqjen e të gjitha njësive speciale të Policisë së Kosovës nga veriu i Kosovës.
Pas takimit të 18 marsit në Ohër, Presidenti serb, Aleksandër Vuçiç deklaroi se zgjedhjet në veri mund të shtyhen në qershor.
