Erion Veliaj tentoi ditën e djeshme ta ndërtonte sfondin e fushatës së tij elektorale për zgjedhjet lokale të 14 Majit mbi “Pemën e 1 Miliontë”, në një Tiranë të “dhuruar” e copëzuar prej tij në duart e oligarkëve të betonit dhe rrokaqiejëve.
Në një kohë kur problemet reale të kryeqytetit lidhen me betonizimin masiv, mungesën e hapësirëave të gjelbërta, trafikun e rënduar dhe mungesën e infrastrukturës rrugore në thuajse çdo lagje, kryebashkiaku sipas Partisë së Lirisë nuk mund të zhvendosi fokusin.
Ndaj, dy kandidatët e PL për anëtar të Këshillit Bashkiak të Tiranës, Tedi Blushi dhe Erion Bixha zbritën në terren, në Njësinë 9, një ndër më të varfërat dhe më të lënë në harresë nga Veliaj, ku infrastruktura rrugore paraqitet si në mesjetë.
Edhe pse qytetarët e Njësisë Nr.9 i paguajnë rregullisht taksat vendore, prej të paktën 8 vitesh ata nuk marrin nga Bashkia shërbimet që meritojnë.
“Erion Veliaj nuk jep llogari ku i çoi taksat e tyre dhe pse në këtë njësi ende nuk ka rrugë të asfaltuara me standarde. Me 350 milion euro buxhet vjetor, Erion Veliaj do të kishte asfaltuar edhe rrugët e Parisit. Por asnjë qindarkë nuk shpenzoi për qytetarët që banojnë në zonën e “Shinave të Trenit” në Njësinë Nr.9. Ndërkohë 100 mijë euro paguan çdo ditë për inceneratorin e Tiranës, që nuk ekziston!”, tha Tedi Blushi teksa në një video të publikuar në Facebook, tregon gjendjen e mjerueshme të rrugëve të lagjes në fjalë.
Sipas Sekretarit të Përgjithshëm të PL, Erion Veliaj “është edhe “pinok” edhe hajdut”.
“A mund t’i besohet sërish?”, është pyetja të cilës sipas Blushit dhe Bixhës, banorët e kryeqytetit duhet t’i japin përgjigje me votë.
“Ndaj më 14 Maj: Bashkë për Ndryshim! Votë për Ndëshkim! Bashkë Fitojmë!”, thekson Blushi.
