Sulmi me breshëri kallashnikovi ndaj ambienteve të televizionit Top Channel, pask pas mesnatës së djeshme, që i mori jetën rojes së sigurisë Pal Kola, për analistin Armand Shkullaku, nuk është as më pak e as më shumë, veçse një akt terrorist.
Shkullaku argumentoi në ‘Çim Peka LIVE’ se është një akt i rëndë që tregon goditje për lirinë e shtypit dhe shëmbëlltyrë e agresionit të shtetit ndaj mediave.
“Është një akt i rëndë që na prek të gjithëve, por ketë e shikoj në një kontekst të lirisë së shtypit në Shqipëri. Nuk është rastësi që Shqipëria është e fundit në Europë porsa i përket lirisë së medias”, u shpreh Shkullaku.
Më tej ai shtoi se ngjarja vjen vetëm kohë pasi qeveria urdhëroi sulmin me tritol ndaj një mediaje tjetër, por edhe aseteve që e mbështesin atë.
Fakti që shteti tregon se mediat janë kaq shumë të cënueshme, bën që të mbizotërojë gjuha e dhunës.
“Përsa i përket sulmit ndaj TCH, për mua është një akt terrorist, që këtë radhë e kanë kryer disa banditë me kallashnikov. Është një akt terrorist që pason një tjetër akt terrorist, shtetëror. Pra nëse botuesit të një mediaje, qeveria i vendos tritol në një ditë pushimi, pa pyetur, ligjin, gjykata, pa pritur një vendim që të sqarojë ligjshmërinë e veprimit të saj, qeveria të vendos tritol.
Pra kur një media qenka kaq e cenueshme kaq kollaj, atëherë pse jo edhe bandidët mund të veprojnë njëlloj. Unë e kam thënë edhe këtu, që vendosja e tritolit ka qenë një akt terrorist, me prapavijë të qartë politike, se kush guxon të dalë nga rreshti e pret ky fakt.
Unë e shikoj të ngjashme me situatën në Siçili, në fund të viteve ’80 dhe fillim të viteve ’90, ku e vetmja gjë që rregullonte marrëdhniet mes biznesit, politikës, medias dhe mafias, ka qenë gjuha e dhunës, nuk ka qenë ligji. Edhe këtu ndodh e njëjta gjë.
Mediat dhe gazetarët sulmohen në një vend ku ligjin e bën mafia”, shtoi më tej Shkullaku.
