Konfliktet mes efektivëve të strukturave të ndryshme të Policisë së Shtetit me njëri-tjetrin jashtë dhe në orët e shërbimit, duket se janë kthyer në “trend” në Shqipëri.
Policia e kryeqytetit, sidomos në fundjavë pretendon se shton patrullat në terren gjatë mbrëmjes për të siguruar rendin, por kjo nuk ka ndodhur mesnatën e së shtunës.
Personat që kanë prishur rendin një natë më parë kanë qenë vetë punonjësit e policisë, që janë konfliktuar me njëri-tjetrin.
Ngjarja ka ndodhur në rrugën “Bardhyl” në kryeqytet ku protagonistë kanë qënë efektivi Hamit Sallaku dhe dy djemtë e di (Denis Sallaku dhe Mariglen Sallaku), të cilët janë konflitkuar me forcat “Shqiponja”, të cilat po patrullonin në atë aks.
Mësohet se një prej djemve të Hamit Sallakut ka qenë nën efektin e alkoolit dhe ka ofenduar punonjësit e “Shqiponjave”. Kjo më pas ka sjellë dhe përplasje mes tyre.
Të dy palët janë shoqëruar nga kolegët në drejtorinë e policisë së Tiranës, ku përmes një njoftimi zyrtar është bërë me dije se efektivi Hamit Sallaku së bashku me dy djemtë e tij janë pezulluar nga detyra.
Njoftimi i policisë:
Drejtori i Drejtorisë Vendore të Policisë Tiranë, Drejtues i Parë Tonin Vocaj, ka pezulluar nga detyra punonjësit e Policisë: – Inspektor H. S., me detyrë ndihmësspecialist për Policimin në Komunitet në Komisariatin Nr. 1; – Inspektor M. S., me detyrë ndihmësspecialist për Hetimin e Krimeve në Komisariatin Nr. 2; – Inspektor D. S., me detyrë ndihmësspecialist për Policimin në Komunitet në Komisariatin Nr. 3.
Gjithashtu, Drejtoria e Standardeve Profesionale në Policinë e Shtetit, ka nisur hetimin disiplinor, si dhe është njoftuar dhe AMP, pasi: Më datë 25.03.2023, rreth orës 23:55, në Rrugën Bardhyl, shërbimet e Forcës së Posaçme Shqiponja, kanë konstatuar tre shtetasit e mësipërm në gjendje të dehur, duke debatuar me njëri-tjetrin si dhe gjatë shoqërimit kanë kundërshtuar punonjësit e Policisë.
Sakaq, vlen të theksojmë se ngjarje të tilla janë të turpshme për vetë peshën që mbart uniforma e Policisë së Shtetit, ku efektivët dhe drejtuesit e tyre duhet të jenë shembull në sjellje dhe respektim të ligjit, për më tepër ky nuk është rasti i parë që punonjës të policisë përfshihen në konflikte banale.
