Shtatë persona kanë mbërritur në spital deri më tani për ndihmë mjekësore, pas aksidenti të ndodhur në rrugën e Elbasanit, ku një autobus i linjës së Kërrabës, i mbushur plot me pasagjerë doli nga rruga dhe u përmbys.
Nuk raportohet për persona në rrezik për jetën, por për lëndime të shkaktuara më shumë nga xhamat dhe përmbysja. Gentjan Qosja është shoferi i autobusit të përmbysur pasditen e kësaj të diele te Rruga e Elbasanit.
Fillimisht autobusi është përplasur me dy mjete të parkuara të cilat ndodheshin pranë rrugës. Nga përplasja ka devijuar dhe është përmbysur. Prej më shumë se 1 ore ishte bllokuar dhe ky aks rrugor, por falë ndërhyjes së efektivëve të policisë, një segment i kësaj rruge është duke funksionuar.
Ende nuk ka një konkluzion përfundimtar, por nga dyshimet paraprake, mund të mos ketë funksionuar si duhet sistemi i frenimit. Sakaq, policia ka bërë të ditur se Qosja i është nënshtruar testit të alkoolit dhe nuk ka rezultuar nën efektin e pijeve alkoolike.
Pamje nga aksidenti:
