Edi Rama shkoi ditën e djeshme në Londër, për t’u hedhur hi syve britanikëve për problemet reale të shqiptarëve që burojnë nga keqqeverisja në Tiranë dhe i detyrojnë të marrin gomonen për të kaluar përgjatë “Kanalit Anglez”.
Rama u kujdes që vizita e parë e një kryeministri shqiptar në “10 Downing Street”, të shitej me pompozitet në mediat në Tiranë si arritje e tij personale.
Por shqiptarët e detyruar të emigrojnë prej kushteve të këqija ekonomike, mungesës së alternativave të punësimit, pasigurisë së jetës dhe “dhunës” shtetërore nuk harrojnë dhe mesazhin ia kanë dhënë në momentin që kryeministri hyn në zyrën e Rishi Sunak.
Edhe pse zgjodhi derën e pasme të “10 Downing Street”, Rama nuk mundi t’i shpëtonte kritikave të një emigranti shqiptar vigjilent, i cili e priti duke e thirrur “Hajdut”, në momentin që kryeministri zbriti nga makina.
“O hajdut. Albanian criminal. Albanian mafia. Duhet të të vijë turp nga vetja. Të gjithë bosat e drogës vijnë këtu”, janë fjalët që dëgjohen t’i drejtojë emigranti shqiptar, Ramës.
Pavarësisht se fjalët e shqiptarit të revoltuar ishin të rënda, kryeministri i shoqëruar nga disa roje sigurie u shfaq i pashqetësuar dhe duke bërë karshillëk.
