Konferencën e përjavshme për mediat këtë të premte, kryedemokrati Sali Berisha e hapi me një denoncim, ku bëri me dije se televizioni kombëtar Top Channel është shitur në kompani me bazë në parajsa fiskale, për 9 milionë dollarë.
“Publikime të besueshme me dokumente autentike, faktojnë se televizioni kombëtar Top Channel, në një aksion, në një veprim tërësisht obskur, tërësisht jotransparent, në shkelje flagrante të ligjeve të vendit, rezulton se në prag të fushatës, i është shitur një shtetasi, i quajtur “Ëestern Media”, në Belizë, me çmimin 9 milionë dollarë”, tha Berisha.
Kreu i opozitës e quajti skandal shitjen e kanalit me licencë kombëtare, duke akuzuar se pas këtij transaksioni me para të dyshimtë, fshihen kryeministri Edi Rama dhe kryebashkiaku i Tiranës, Erion Veliaj.
“Ky është një veprim i pashembullt, asgjësimi i një televizioni kombëtar, me licencë kombëtare, tjetërsimi i tij në kundërshtim me çdo rregull, shitja fallco si kunata e Olta Xhaçkës, që ishte pronare e resortit strategjik të burrit të saj, përbën një veprim të tmerrshëm mafioz, personalisht të Edi Ramës dhe klanit të tij.
Një televizion kombëtar ka marrë një valë dhe frekuencë kombëtare. Këto janë pasuri publike. Ato nuk privatizohen. Asnjë televizion nuk mund të përfundojë në Belizë të Edi Ramës, Erion Veliajt, të këtyre mafiozëve që nuk kanë ligj, moral dhe asgjë tjetër.
Muaj më parë, televizioni Top Channel filloi një linjë editoriale të pavarur, linjë editoriale e cila e bëri atë objekt sulmesh të egra të Edi Ramës. Por duket se skemat e Tikut të partisë është një skemë universale. Ato editoriale ishin si një gjobëvënie ndaj qeverisë, na bli me 9 milionë ose do kesh këto pasoja. Kjo është një nga ditët më të zeza në historinë e medieve shqiptare.
Unë i them zonjës Hoxha se me këtë akt, ke kryer një krim të shëmtuar ndaj publikut shqiptar. Ti nuk mund ta përdorësh si një mjet personal një valë kombëtare, një frekuencë kombëtare. Ke kryer një akt që çdo ligj të bën përgjegjës, sigurisht së bashku me Edi Ramën dhe Erion Veliajn”, u shpreh më tej Berisha.
Sipas ish-kryeministrit, Prokuroria e Posaçme është e kapur nga qeveria, pasi në një vend normal pas një denoncimi të tillë, SPAK duhet të kishte reaguar.
“SKAP-i është i kapur, sepse prej kohësh duhej të kishte nisur hetimet. SKAP-i është po kaq i kapur, në mos më shumë se këta që kryejnë këto akte,” theksoi Berisha.
