Rreth dy muaj jemi larg zhvillimit të zgjedhjeve lokale të 14 majit. Përveç rezultatit do të ndiqet me vëmendje edhe ecuria e procesit zgjedhor, me policinë që do të ketë për detyrë të ruajë rendin në ditën e votimit dhe më pas gjatë procesit të numërimit.
Këto dy procese në zgjedhjet e mëparshme janë shoqëruar me incidente, disa herë edhe të rënda, ndaj ndërkombëtarët dhe qytetarët do të jenë sy e vesh drejtuar nga uniformat blu, që kanë në duar një detyrë tepër të rëndësishme.
E teksa kërkohet mobilizimi maksimal i tyre, duket se ministri Çuçi dhe Drejtori i Përgjithshëm i Policisë, Muhamet Rrumbullaku kanë menduar të realizojnë një rokadë në disa komisariate.
Këtë të martë janë realizuar një sërë lëvizjesh në disa komisariate vendore të Policisë së Shtetit.
Kështu drejtimin e policisë së Kavajës e ka marrë Gazmend Dermozi, i cili emërohet shef komisariati.
Këtë pozicion më herët e ka mbajtur Emiljan Pashaj, i cili do të marrë detyrën si Specialist për Narkotikët në Drejtorinë e Përgjithshme të Policisë.
Sakaq mësohet se Behar Caka është emëruar shef komisariati në Lezhë, ndërsa në Mirditë shkon Paulin Çupi.
Edhe në Kukës ka ndryshime, pasi shef komisariati është emëruar Julian Qyta. Ndërkohë në Laç është emëruar në detyrë Dritan Meta.
