Drejtoria e Përgjithshme e Burgjeve ka miratuar kërkesën për leje të ish-ministrit Saimir Tahiri, për të marrë pjesë në ceremoninë mortore të babait të tij.
Saimir Tahiri ka marrë një leje 48 orëshe për të qenë pjesëmarrës në varrimin e babait të tij, Bashkim Tahiri, i cili ndërroi jetë një ditë më parë.
Gjatë kësaj periudhe, Tahiri do qëndrojë nën shoqërinë e efektivëve të policisë së burgjeve, të cilët do garantojnë sigurinë e tij.
Ai është fotografuar i përqafuar me të ëmën e tij.
Lajmin e vdekjes e bëri të ditur vetë Tahiri ditën e djeshme përmes një letër prekëse nga burgu.
“O Ba, si nuk më prite? Me sa nxitim e more këtë rrugën e fundit dreqin. Të ndritë shpirti atje lart!
Mua me bëre dhuratën më të madhe ndonjëherë, më bëre burrë. Dhe rri i qetë andej, mos u mërzit më. Qesh e gëzohu siç bëje këtu me ne. Sa here bëhesha gati po nuk ta thosha dot se më vinte zor, por ja po ta them tani që nuk më dëgjon më: Të dua shume Ba!
Të duam të gjithë shumë shoku Bashkim. Përgjithmonë!”- shkruante Tahiri.
