Kryeministri Edi Rama pritet që ditën e sotme të zhvillojë një takim me presidentin Bajram Begajn.
Burime për mediat bëjnë me dije se takimi mes Ramës dhe Begajt do të zhvillohet në Presidencë dhe vjen në një kohë kur kanë mbetur më pak se dy muaj nga zgjedhjet lokale të 14 majit. Raportohet se pjesë e diskutimit të tyre mund të jetë vendimi për pezullimin e dhënies së shtetësisë shqiptare për investitorët e mëdhenj, ose siç njihet ndryshe si projekti i “pasaportave të arta”, një nismë kjo e kundërshtuar nga aktorët kryesorë të politikës ndërkombëtare.
Sot, në orën 10:00 do të zhvillohet edhe mbledhja e radhës e qeverisë, ku në përfundim të saj, ministrat do të komunikojnë për mediat vendimet e miratuara.
Ky takim vjen dy ditë para se kreu i qeverisë të niset për një vizitë në Greqi, ku do të takohet me homologun grek, Presidentin dhe Kryetarin e Parlamentit të vendit fqinj.
Gjithashtu nga takimi i fundit i Ramës me Begajn, në 6 janar, ku është diskutuar për ndryshimet e ambasadorëve, kjo çështje ende nuk është zgjidhur. Një ditë më parë, Rama njoftoi se sot do të zhvillojë takime edhe me sipërmarrësit, mirëpo duket se ndalesa e parë e tij do jetë Presidenti.
