Vangjush Dako dhe Artur Bushi janë paraqitur në Prokurorinë e Posaçme të Enjten (dje) dhe këtë të Premten.
Burime pranë strukturës hetimore thanë se ish-kryebashkiaku socialist i Durrësit Vangjush Dako u thirrje dje në SPAK, ku u mor në pyetje për rreth 4 orë.
Sipas të njëjtave burime, ai është pyetur për një objekt që ka ndërtuar tre kate pa leje, të legalizuara më pas. Objekti më pas pësoi dëmtime të konsiderueshme nga tërmeti i 26 nëntorit 2019. Për çështjen ka pasur një kallëzim më herët, ndërsa Dako është pyetur si person që ka dijeni mbi rrethanat e hetimit.
Emri i Vangjush Dakos doli edhe në përgjimet e dosjes 339, që zbuluan lidhjen e zyrtarëve të lartë me persona me precedentë të theksuar kriminale me qëllim shit-blerjen e votave apo ndikim në zgjedhjet parlamentare të 2017-ës. Hetimet për çështjen e krimit zgjedhor u ndanë më tej nga akuza në fraksion të dosjes 339, megjithatë ndaj asnjë zyrtari nuk janë ngritur akuza penale, deri më sot.
Ish-kryebashkiak i Durrësit për tre mandate ka mohuar të gjitha akuzat ndaj tij. “Jam i pastër, jam akullore”, do të deklaronte ai në një emision televiziv disa vite më parë. Ndërkohë, sipas Departamentit Amerikan të Shtetit që e ka shpallur person “non grata”, Dako “ka qenë i përfshirë në korrupsion gjatë mandatit të tij si kryetar i Bashkisë së Durrësit”.
Këtë të Premte, edhe kryetari i Bashkisë së Krujës, Artur Bushi, u paraqit në Prokurorinë e Posaçme kundër Korrupsionit dhe Krimit të Organizuar.
Pas rreth 1 orë e 30 minuta, Bushi doli nga SPAK duke thënë për gazetarët jashtë ambjenteve të Prokurorisë së Posaçme se, nuk kishte asnjë serioze në marrjen e tij në pyetje. Ndërsa avokati i Bushit tha se Inspektoriati Ndërtimor që është në varësi të Bashkisë së Krujës ka vendosur disa gjoba për disa instituicione që lidhen me çështje të ndryshme. Sipas tij, këto institucione kanë ngritur padi ndaj Inspektoriatit Ndërtimor dhe për këtë arsye, Bushi si titullar i institucionit që ka në varësi këtë strukturë është thirrur për t’u marrë në pyetje.
Për të, në SPAK, sipas raportimeve mediatike, janë depozituar disa kallëzime. Për 3 prej tyre është regjistruar procedim penal, për 2 të tjerë është vlerësuar të dërgohen për kompetencë në Prokuroritë e Rretheve Gjyqësore, ndërsa për 2 të tjera është vendosur mosfillim procedimi. Aktualisht dy nga kallëzimet janë në fazë hetimi, por deri më tani nuk ka informacione se është regjistruar emri i Bushit.
Pak para zgjedhjeve vihet re një “fluks” i kryebashkiakëve dhe ish-kryebashkiakëve socialistë, të cilët paraqiten në SPAK. Disa javë më parë, ish-drejtuesi i Bashkisë së Kavajës Elvis Roshi, i kallëzuar për shkelje në procedura tenderuese, u thirr nga prokuroria e Posaçme.
Dy ditë më parë, kryebashkiaku i Bulqizës, Lefter Alla, u arrestua me kërkesë të SPAK, bashkë me nënkryetaren e bashkisë dhe persona të tjerë, për abuzime me tenderin e ndërtimit të një ujësjellësi në një lagje të qytetit, me vlerë 2,8 milionë euro.
Kryetari i PD-së, Sali Berisha deklaroi një ditë më parë se Alla u burgos me urdhër të Ramës. Sipas tij, Alla donte të rikandidonte për një tjetër mandat, në kundërshtim me synimet e shefit të tij politik.
Ndërsa më herët, në pranga kanë përfunduar edhe së paku tre kryebashkiakë të tjerë socialistë.
