Në Këshillin e Legjislacionit u diskutua këtë të mërkurë mandati i Olta Xhaçkës.
Para nisjes së mbledhjes ka pasur një debat mes përfaqësuesve të PS dhe PD për mënyrën se si do të bëhet mbledhja. Përfaqësuesit e PS kërkuan që mbledhja të bëhet e mbyllur. Përfaqësuesja e PD, Dhurata Çupi kërkoi që media të jetë në mbledhje dhe të ndjekë diskutimin. Sipas Çupit, nuk ka asnjë dispozitë që të bëhet mbledhja e mbyllur. Çupi kërkoi të lejohen mediat të cilat kanë pritur prej më shumë se 40 minutash në hyrjen e Kuvendit.
Në fund të diskutimeve, që u zhvilluan kryesisht për çështje procedurale, kryetarja e këshillit Ermonela Felaj tha se mbledhja do të shtyhet për në 29 Mars “për të paraqitur raportet për setin e vendimeve të Gjykatës Kushtetuese, objekt diskutimi: shqyrtimi dhe analizimi i kësaj mbledhje”.
Me një vendim të disa javëve më parë, Kushtetuesja ktheu në Kuvend kërkesën e deputetëve të opozitës për heqjen e mandatit të Olta Xhaçkës, duke e detyruar intitucionin të bëjë të njëjtën kërkesë në GJK. Një vendim ky që shtyu në kohë kërkesën shqyrtimin e kërkesës për shkarkimin e Xhaçkës si deputete.
Sipas dy padive të depozituara në Kushtetuese nga PD e drejtuar nga Berisha dhe grupi Alibeaj, Xhaçka akuzohet se ndodhet në kushtet e konfliktit të interesit si deputeti, teksa bashkëshorti i saj ka patur përfitime nga pasuri shtetërore.
