Në vitin 2007, Ibrahim Lika, i arrestuar pas një konflikti ditën e sotme në Burrel, është arrestuar edhe për vrasjen e bashkëshortes.
Kjo e fundit u qëllua me armë zjarri brenda banesës ku jetonte çifti në Burrel. Pas ngjarjes, ai u largua nga banesa për tu arrestuar më pas.
Sipas raportimeve mediatike të kohës, pasi ka shkrepur një breshëri automatike brenda dhomës së ndenjes, plumbat e së cilës kanë prekur bashkëshorten e tij, Ibrahim Lika është larguar me shpejtësi përmes pallateve, duke u fshehur në bregun e lumit, përbri qytetit të Burrelit.
Arratia dhe arrestimi
Lika ka shfrytëzuar disa rrugë të pafrekuentuara fshatrash për t‘u larguar në drejtim të Tiranës. Sipas deponimeve të tij në polici, ai nuk ka dashur të dorëzohet në policinë e Burrelit, dhe për këtë kishte vendosur të dorëzohej në policinë e Tiranës. Madje, përkundër kërkimit policor ai ka mundur që të mbërrijë deri në Tiranë. Fillimisht ka udhëtuar për disa orë në këmbë, deri në fshatin Baz të Burrelit, fshat i cili është anës rrugës që lidh Burrelin me Tiranën. Për të mos rënë në dorë të policisë matjane, Lika ka udhëtuar i vetëm në këmbë përmes shtigjesh malore dhe dushqesh të shumta, në një errësirë të plotë. Me të mbërritur në afërsi të fshatit Baz, Ibrahim Lika ka parë dritat e një furgoni që kishte si drejtim Tiranën. Duke qenë i lodhur dhe me një moshë të thyer, ai ka vendosur të braktisë rrugën paralele këmbësore dhe është ngjitur në trasenë e asfaltit, ku edhe ka bërë të mundur ndalimin e furgonit. Lika u është bashkangjitur pasagjerëve të tjerë dhe rreth mesnatës ka arritur që të mbërrijë në Tiranë dhe i është drejtuar shtëpisë së një të afërmi të tij në periferi të qytetit, pranë Babrrusë.
Me të mbërritur në shtëpinë e të afërmit të tij, asokohe 65-vjeç, ai ka vendosur të dorëzohet në polici dhe një nga të afërmit ka telefonuar policinë, duke i treguar vendndodhjen e të kërkuarit. Një furgon i grupit të gatshëm të Komisariatit 3 të kryeqytetit ka shkuar menjëherë në adresën e treguar dhe ka gjetur aty Ibrahim Likën, i cili është dorëzuar pa rezistencë. Në policinë e Tiranës, burri ka treguar se është autor i vrasjes. Ai ka dhënë disa detaje të ngjarjes, por pa u thelluar në motivet e saj. “Kam qenë i dehur. Nuk e kontrolloja dot veten kur shkreha armën”, mësohet të ketë thënë burri.
Në varrimin e gruas që vrau
Mediat kanë raportuar po ashtu se Ibrahim Lika, i shoqëruar nga forca policore, është lejuar nga autoritetet të marrë pjesë në varrimin e së shoqes që vrau.
Në shtypin e shkruan është raportuar se në një moment gjatë funeralit, ka vënë dorën mbi ballin e bashkëshortes së tij të pajetë, me të cilën kishte kaluar një jetë të tërë dhe kish lindur plot shtatë fëmijë dhe ka shqiptuar fjalët: “Më fal! Më fal, nuk desha të të vrisja e as më kishte shkuar kurrë në mendje të vrisja”!
