Policia e Tiranës ka arrestuar pasditen e sotme shefin e Stërvitjes pranë Repartit Special RENEA, pasi në automjetin me të cilin lëvizte u gjet një shumë e konsiderueshme parash të padeklaruara.
Mësohet se Altin Morinës i janë gjetur 113 mijë euro cash në mjetin e tij luksoz tip “Audi”.
Dyshimet fillestare ishin se arrestimi i 43-vjeçarit lidhej me masakrën në “Don Bosko”, ku nga breshëria e kallashnikovit mbi lokalin në pronësi të vëllait të Fajton Muratit mbeti e vrarë banakierja Mimoza Paja dhe u plagosën pesë persona të tjerë.
Ende policia nuk ka sqaruar nëse efektivi i RENA-s ka lidhje me ngjarjen e rëndë që u regjistrua në Tiranë, por në njoftimin zyrtar bëhet me dije se Morina është arrestuar për pastrim të produkteve të veprës penale, fshehje e të ardhurave dhe shpërdorim detyre.
Njoftimi i policisë:
Finalizohet nga Forca e Posaçme “Shqiponja” operacioni policor i koduar “Fast”, falë inteligjencës informative.
Vihet në pranga për pastrim të produketeve të veprës penale, fshehje e të ardhurave dhe shpërdorim detyre një 43-vjeçar, punonjës policie në Repartin Renea.
Sekuestrohen në cilësinë e provës materiale shuma të madhe në euro, paund e lekë shqiptare.
Mesditën e sotme, falë inteligjencës informative se një shtetas (punonës police), qarkullonte me automjet tip “Audi” dhe kishte me vete sasi të konsiderueshme parash, menjëherë shërbimet e Forcës së Posaçme “Shqiponja”, kanë organizuar dhe finalizuar operacionin policor të koduar “Fast”.
Në kuadër të këtij operacioni, te Kodra e Diellit, shërbimet e Forcës së Posaçme Shqiponja kanë konstatuar dhe shoqëruar në ambientet e DVP Tiranë automjetin e dyshuar sëbashku me drejtuesin e tij shtetasin A. M., 43 vjec, banues në Tiranë, me detyrë Shef i Stërvitjes te Reparti Special Renea.
Gjatë kontrollit dhe kryrjes së automjetit rezultoi se në serdiljen e pasagjerit, në vendin e parë të automjetit, ndodhej një qese plasmasi brenda të cilës kishte lekë, euro dhe paund.
Nga numërimi rezultoi se në qesen e palsmasit kishte rreth 113 mijë euro, rreth 290.00 lekë të rinj dhe 80 paund, të cilat u sekuestruan në cilësinë e provës materiale.
Në përfundim të veprimeve të para hetimore të kryera nga strukturat hetimore të DVP Tiranë u bë arrestimi në flagrancë i shtetasit A. M., dhe materialet i kaluan Prokurorisë së Rrethit Gjyqësor Tiranë për veprime të mëtejshme për vepra penale “Pastrimi i produkteve të veprës penale ose veprimtarisë kriminale”, “Fshehja e të ardhurave” dhe “Shpërdorimi i detyrës”.
