Komisioneri i Zgjedhjeve, Ilirjan Celibashi ka vendosur që të mos pranojë kërkesën e Enkelejd Alibeajt për tu regjistruar në zgjedhjet e 14 majit.
Menjëherë pas vendimit deputeti i Partisë Demokratike, Gazment Bardhi, ka reaguar ashpër pas vendimit të kreut të KQZ-së, Ilirjan Celibashi, për mos-regjistrimin e PD-së në zgjedhjet e 14 majit. Përmes një reagimi në Twitter, Bardhi e konsideroi Celibashin një njeri të shantazhueshëm që nuk gëzon respekt.
“Asnjë njëri i shantazhueshëm dhe që nuk respekton ligjin, nuk meriton asnjë respekt. Ilirjan Celibashi ka humbur besimin e PD për të administruar procesin zgjedhor. Ai shkeli rëndë ligjin, për qëllime politike. Vendimi do të ankimohet menjëherë në KAS”, është shprehur Bardhi.
Edhe Enkelejd Alibeaj reagoi ashpër pasi KQZ nuk pranoi të regjistrojë në zgjedhje PD me kryetar Lulzim Bashën, por që me autorizim grupin prej 18 deputetësh e drejton ai nga 18 marsi 2022.
Kryetari i komanduar i PD-së së Bashës e ka konsideruar vendimin e Celibashit të ndikuar politikisht nga aktorë të tjerë të politikës.
“Vendimi i paralajmëruar i Komisionerit të Zgjedhjeve është qartas i ndikuar politikisht nga aktorët politikë të interesuar që PD të mos regjistrohet në procesin e zgjedhjeve vendore të 14 majit. Sikundër e deklaroi dhe publikisht, zoti Celibashi e ka të pamundur të ndajë opinionet dhe tifozerinë personale nga faktet juridike. Për pasojë, vendimi i tij e zgjat pa fund dhe pa arsye të qenësishme regjistrimin e PD. Dukshëm, e madje deri në kufijtë e groteskut, komisioneri nisur vetëm për shërbim politik ndaj kundërshtarëve të PD, vendos ta përjashtojë nga zgjedhjet. Siç ndodhte këtu e 32 vjet më parë, kur ishte partia në pushtet ajo që lejonte ne zgjedhje vetëm satelitët e saj. Kjo marrëzi politike, si 32 vjet më parë, i ndodh sot Shqipërisë kur është vend i NATO-s dhe synon të jetë anëtar i BE-së!”, shprehet Alibeaj.
Ai shton se ky vendin do të ankimohet në KAS dhe premton se ata që duan ta dëmtojnë PD nuk do t’ia dalin.
“Megjithëkëtë e si përherë do të vijojmë rrugën ligjore për të finalizuar përfaqësimin e PD në 14 maj. Çdo artificë ligjore apo arsye e stisur politike dhe aspak ligjore është thjesht rruga e dëshpëruar që zgjatime të politikës së vjetër në institucione kushtetuese të pavarura kanë zgjedhur për të na penguar në rrugën tonë. Nuk do ia dalin!”, nënvizon Alibeaj.
Ndërkohë vetë kreu i KQZ, iu përgjigj dyshes në fjalë, duke u ndalur veçanërisht te akuzat e deputetit Gazment Bardhi dhe tha se gjuha e përdorur është e pa tolerueshme.
“Në çdo pikëpamje nuk jam i shantazhueshëm dhe kam dedikimin profesional për të respektuar ligjin. Zbatimi i ligjit dhe korrektësia në zbatimin e saj ka qenë shtylla kurrizore e punës sime. Më vjen keq që zoti Bardhi e sheh të pabazuar vendimin tim. Gjuha e përdorur e pa tolerueshme. Nuk i bën nder figurës së tij. Nuk e gjen asgjë të thotë vlerësojmë se një vendim i tillë nuk është marrë në përputhje me kodin dhe kjo do ishte e mjaftueshme”, tha Celibashi.
