Tre persona janë arrestuar ditën e sotme në Durrës, pasi kanë tentuar që të kalojnë kufirin me dokumente të falsifikuara.
Blutë bëjnë me dije se në pranga kanë rënë shtetasit: Sh. H., 37 vjeç, F. H., 23 vjeç, të dy banues në Kosovë dhe M. S., 39 vjeç, banues në Turqi.
“Shërbimet e Policisë Kufitare në PKK port Durrës, bazuar në analizën e riskut, kanë kaluar për kontroll më të detajuar, 3 shtetas, për të cilët kishin dyshime se kishin paraqitur dokumente false. Pas verifikimeve rezultoi se dokumentet që kishin paraqitur këta shtetas, për të dalë jashtë Shqipërisë, ishin të falsifikuara. Në përfundim të veprimeve u arrestuan në flagrancë, për veprën penale “Falsifikimi i letërnjoftimeve, i pasaportave ose i vizave”, shtetasit: Sh. H., 37 vjeç, F. H., 23 vjeç, të dy banues në Kosovë dhe M. S., 39 vjeç, banues në Turqi. Dokumentet e falsifikuara u sekuestruan në cilësinë e provës materiale”,-njofton policia.
Materialet i kaluan Prokurorisë, për veprime të mëtejshme.
