Analisti Fatos Lubonja deklaroi se situata problematike e opozitës është produkt i një pune për të përçarë opozitën nga ana e mazhorancës, e cila sipas tij ka në dorë institucionet ligjore, administratën dhe ekonominë.
I ftuar në studion e News24 në rubrikën “Opinion”, Lubonja tha se Rama ka dëshirë të ketë gjithë pushtetin dhe mund të ketë urdhëruar mos regjistrimin e asnjërës nga palët për shkak të “paranojave”.
Ai shtoi më tej se mazhoranca është gjithnjë e më arrogante në marrjen e hapësirave demokratike në vend dhe se e gjithë opozita duhet të bashkohet duke përfshirë këtu edhe partitë e vogla për të larguar Ramën nga pushteti, të cilin e cilësoi si “armiku i madh”.
“Situata problematike dihet dhe është produkt i një pune për të përçarë opozitën nga ana e mazhorancës pa hequr nga kjo përgjegjësi edhe një pjesë të përgjegjësisë që ka vetë Partia Demokratike me të dyja palët që nuk kanë arritur të zgjidhin atë mosmarrëveshje. Kjo është problematikja për ta, ndërsa kuptohet se një parti që hyn në zgjedhje ka rëndësi të përçojë optimizëm te votuesit dhe ky optimizëm përputhet edhe me një pakënaqësi ndaj mazhorancës.
Nga ana tjetër situata mbetet problematike kur sheh se këtu nuk ka hyrë në fushatë PS-ja, por në anën e mazhorancës është partia-shtet me gjithë instrumentet e veta. Është një opozitë që lufton me shtetin që ka institucionet ligjore, ka administratën, KQZ-në dhe ekonominë. Ekonomia jonë nuk është e një tregu të lirë por e shantazhueshme. Kemi një regjim që e bën problematike situatën.
Sa i përket regjistrimeve ose kemi të bëjmë me Celibashin që nuk kërkon të shohë Alibeajn të shkojë në zgjedhje, ose Edi Rama është aq i pangopur në përçarje dhe eliminim sa thotë se këta nuk duhet të jenë fare në zgjedhje, asnjë grupim. Këtu nuk hyn vetëm arsyeja në lojë, hyn edhe paranojat që mund të ketë zhvilluar Rama. Hyn në lojë dëshira për gjithëpushtetshmëri dhe për të eliminuar këdo. Të dyja bashkë e çojnë deri në këtë, aq më shumë sa rri në pushtet të tjerët duken si miza dhe të pavlerë. Rama sigurisht ka frikë se ka bërë aq shumë gjëra, që edhe pse ka kapur gjykatat, ka një opozitë që i thotë. Ky ndoshta do të rrijë i qetë fare dhe i do të gjithë rrafsh. Pushteti absolut korrupton në mënyrë absolute”, u shpreh Lubonja.
“Koalicioni PL-PD ka diçka pozitive, që e ka të qartë bashkimin e opozitës. Në këtë rast bashkimi vjen te figura e kandidatit që të dyja palët e mbështesin. Si parti kërkojnë në këshillat e tyre, më duket logjike dhe më efektive po të kemi parasysh se gjithë kandidatët për këshilltarë bashkiakë shumëzohen për dy, pasi ka nga të dyja partitë dhe do ketë më shumë njerëz që kërkojnë vota.
Shoh një mazhorancë që është gjithnjë e më arrogante në marrjen e hapësirave demokratike në vend. Lënia e vendimit të vulës deri vonë ishte e stisur. Kur arrin deri këtu puna, që ata kanë udhëzime për të mos lejuar as partitë e vogla, situata është serioze. Partitë e vogla duhet të gjenin mënyrën për t’u bashkuar te opozita e madhe. Duhet përcaktuar armiku në politikë, gjë tjetër të thuash janë edhe Berisha edhe Rama, por kur shikon që njëri po eliminon fare tjetrin dhe kërkon të mbetet i vetëm, armiku i madh mbetet ky. Rotacioni është i mirë, pushteti absolut që kërkon Rama korrupton në mënyrë absolute. Mund të gjendet një formulë edhe për ta. Sot nuk mund të thuhet që të dyja palët janë njësoj të këqija. Pyetja është se çfarë është demokracia”, tha ai.
