Ndeshja mes Llapit dhe Ballkanit në Superligën e Kosovës është shoqëruar me një incident aspak të këndshëm. Në fund të sfidës të luajtur në Podujevë, kishte përplasje të dhunshme mes tifozerive të dy skuadrave.
Sipas mediave kosovare, tifozët e Ballkanit kanë thyer stolat në shkallaret e stadiumit duke gjuajtur mbështetësit vendas, të cilët më pas kanë vepruar në të njëjtën mënyrë. Kësisoj, ka nisur një luftë e mirëfilltë në tribuna mes mbështetësve të dy skuadrave, me stjuardët të cilët nuk ishin në gjendje të kontrollonin situatën.
Qetësia është vendosur vetëm pas ndërhyrjes së policisë, e cila ka arrestuar disa prej tifozëve, ndërsa po shqyrtohen të gjitha pamjet filmike për të identifikuar dhe ndaluar pjesëmarrës të tjerë në këtë incident të shëmtuar.
