Deri në orën 11:00 të kësaj të shtune, Lulzim Bashës së dorëhequr si kryetar i PD një vit më parë, do t’i duhet të firmosë pas kërkesës së KQZ, “deklaratën e angazhimit solemn të kryetarit të partisë politike”, që rezulton se mban firmën e e Enkelejd Alibeajt.
Kjo deklaratë është pjesë e dokumentacionit të paraqitur nga përfaqësuesi ligjor i grupit “Alibeaj” në KQZ me qëllim regjistrimin në zgjedhjet lokale të 14 majit.
Por, kreu i KQZ, Ilirjan Celibashi tha të enjten se kjo deklaratë nuk është kompetencë por përgjegjësi personale dhe si e tillë duhet firmosur nga vetë Basha.
“Çdo kompetencë tjetër e kryetarit të partisë mund të delegohet te të tretë, sa kohë ligji nuk përcakton kufizime. Deklarata e kryetarit të partisë nuk është kompetencë, është përgjegjësi dhe si përgjegjësi nuk delegohet. Për analogji, detyrimi për të kryer shërbimin ushtarak nuk mund të delegohet. Duke qenë përgjegjësi, është personale. Jo më kot ligjvënësi e ka përcaktuar si të tillë, përgjegjësi. Kompetenca delegohet, përgjegjësia jo”, tha Celibashi.
Gjasat janë që në përfundim të afatit prej 48 orësh që Celibashi la në fuqi, Basha të mos firmosë asnjë dokument.
Ashtu siç Enkelejd Alibeaj dhe Gazment Bardhi kanë paralajmëruar, në KQZ pritet të kërkohet regjistrimi në zgjedhje me të njëjtin dokumentacion që Indrit Sefa depozitoi të hënën.
Nëse grupimi i Alibeajt do të shkojë sërish me të njëjtin dokument të firmosur nga Alibeaj me pretendimin se Basha ka dhënë dorëheqjen, më pas do të jetë në dorë të Celibashit do ta pranojë apo jo argumentin e tyre.
Por kjo lëvizje, do të vinte seriozisht në pikëpyetje të madhe regjistrimin në zgjedhje të grupit që mban logon e PD, pas vendimit të Apelit për të dërguar për rigjykim në Shkallën e Parë çështjen e vulës së selisë blu.
Dyshimet janë se çështja mund të shkojë edhe në KAS, ashtu siç paralajmëroi në mbledhjen e së enjtes në KQZ, përfaqësuesi ligjor i grupit “Alibeaj”, dhe Komisioni i Ankimeve & Sanksioneve do të ketë në duar fatin e tyre, nëse Komisioneri do t’i qëndrojë deklaratës se nuk miraton kërkesën pa plotësim dokumentesh.
Sakaq, përfaqësuesit ligjor të Sali Berishës argumentojnë se Lulzim Basha jo vetëm që ka dhënë dorëheqjen në 21 Mars të vitit të kaluar, por ndaj tij ka një proces gjyqësor që vijon në Gjykatën e Tiranës me paditëse Edit Harxhin, e cila kërkon ç’regjistrimin e tij si kryetar.
Sipas Ledio Nurajt, vendimi i Apelit nuk zhbëri atë të Gjykatës së Tiranës në 25 Mars të 2022, që regjistroi Partinë Demokratike të drejtuar nga Berisha.
Ndërkohë, mbrëmjen e djeshme në një tjetër lëvizje që ngre pikëpyetje mbi mënyrën sesi KQZ do të veprojë me grupin “Alibeaj”, nga Celibashi u miratuan listat e anëtarëve të KZAZ-ve që ishin paraqitur prej Indrit Sefës, në një kohë që të dy palët brenda selisë blu kanë depozituar listat me anëtarë.
