Artan Lame është larguar nga posti i kreut të Agjencisë Shtetërore të Kadastrës, dy ditë më parë.
Në krye të kësaj Agjencie është emëruar Dallëndyshe Bici, e cila deri sot ka drejtuar Inspektoratin Kombëtar të Mbrojtjes së Territorit.
Lame teksa mori fjalën në prezantimin e drejtoreshës së re Bici, foli për punën në të gjithë këto vite, teksa është shprehur se ç’do punonjës i Kadastrës, duhet të ndjejë prapa qafës frymën e Drejtorit, por edhe sytë e Kryeministrit.
Lame: Kadastra nuk përbën më lajm, sepse tashmë Institucioni është vënë në binarët e punës së zakonshme, i ka përfunduar reformat e mëdha. C’do punonjës i Kadastrës, duhet të ndjejë prapa qafës frymën e Drejtorit, por edhe sytë e Kryeministrit. Reforma e pronës nuk do të ishte ndërmarrë kurrë pa Edi Ramën. Askush tjetër nuk do t’i kishte hyrë një qederi të tillë, përveçse një njeri si ai.
Shërbejuni njerëzve, sepse ky institucion egziston pikërisht për këtë gjë, për të shërbyer. Kur nuk përton Kryeministri të më nisë mua ankesën e çdo qytetari, mereni me mend se sa shërbim dhe impenjim pritet nga secili prej jush! Kryeministri m’i çonte ankesat e qytetarëve, ndonjëherë të shoqëruara edhe me fjalët e veta: “Lameeee, i çmendët njerëzit”! Nuk e kam vuajtur ndërhyrjen e Kryeministrit në vendimmarrjet e mia. Për këtë e falenderoj sinqerisht, sepse bëhet fjalë për një institucion që jetë e mot ka qenë purtekë në erë, që përkulej ose nga frynte paraja, ose nga frynte pushteti.
Lame u emërua në postin e kreut të Kadastrës që prej marsit të vitit 2019, në drejtim të institucionit që bashkon ALUIZNI-n dhe hipotekën.
