Për liderin e opozitës Sali Berisha, vendimi i Gjykatës së Apelit dhe kërkesa e grupit “Alibeaj” në KQZ për t’u regjistruar në zgjedhje janë element që tregojnë se pushteti po i jep logon dhe vulën e Partisë Demokratike, pengjeve të Edi Ramës.
Në përvjetorin e 60-të të ditëlindjes së Azem Hajdarit, Berisha u shpreh i bindur se Partia Demokratike do të marrë pjesë në zgjedhje përballë regjimit të mazhorancës dhe do t’i tregojë shqiptarëve nëpërmjet alternativës së saj se Edi Rama nuk e meriton të qeverisë.
“Bëjnë gjithçka që të mos hyjmë në zgjedhje duke i dhënë vulën dhe logon pengjeve që kanë marrë. Ne do mbetemi parti me vlera evropiane dhe aleatët tanë do mbeten SHBA-të. Ne mbetemi të angazhuar që në këto zgjedhje të marrim rezultatet më të mëdha dhe t’i japim goditjen më të fuqishme regjimit të Edi Ramës. Ne do marrim pjesë në zgjedhje!
Kudo që shkoj gjej një klimë entuziazmi si kurrë më parë. Ekziston e drejta për shqiptarët, edhe për ata që kanë pasur vërejtje. Rama bashkë me të korruptuarit e tjerë po bën gjithçka për të krijuar një pseudo opozitë. Ata janë armiq dhe nuk kanë asnjë lidhje me lirinë.
Azemi sot është më i gjallë se kurrë, njëlloj si ngrihej mbi supet e studentëve në dhjetor dhe ne sot të frymëzuar nga ai do vijojmë betejën tonë në të gjitha fushat në një revolucion të pandalshëm deri në përmbysjen e këtij regjimi mafioz që nuk meriton të qeverisë Shqipërinë asnjë ditë”, deklaroi Berisha.
