Prokuroria e Posaçme ka reaguar në lidhur me disa raportime mediatike që kanë vënë në qendër të vëmendjes prokurorët Klodjan Braho dhe Ened Nakuçi. Në thelb, raportimet mediatike ngrinin dyshime se dy prokurorët “po falnin” apo “nuk po hetonin” ish-zëvendëskryeministrin Arben Ahmetaj.
Në një njoftim zyrtar, SPAK sqaron procedurën e ndjekur për dosjen e inceneratorit të Elbasanit, për të cilën thotë se “në disa media dhe portale mediatike janë ngritur pretendime në lidhje me veprimet proçedurale të kryera nga prokurorët Klodjan Braho dhe Ened Nakuçi”.
Prokuroria e Posaccme kujton ndarjen e dosjes, ndërsa specifikon se hetimet ndaj Ahmetajt nuk po zhvillohet nga asnjë prej prokurorëve Braho apo Nakuçi, por nga Enkeleda Millonaj.
“Në lidhje me veprimet e kryera nga shtetasi Arben Ahmetaj në cilësinë e Ministrit të Zhvillimit Ekonomik dhe Sipërmarrjes, Ministrisë së Drejtësisë, si dhe në lidhje me disa fakte dhe rrethana të tjera që kanë rezultuar nga hetimet e paraprake, është vendosur ndarja e çështjes penale duke u rregjistruar proçedimi penal nr.277/1, datë 19.09.2022. Ky proçedim penal është hetuar nga prokurori Klodjan Braho dhe është ndarë si proçedim penal më vete para se prokurori Ened Nakuçi të bëhej pjesë e grupit hetimor për proçedimin penal nr.277 viti 2020. Aktualisht, proçedimi penal nr.277/1 viti 2022 është duke u hetuar nga prokurore Enkeleda Millonaj, pasi me vendimin e Drejtuesit të Prokurorisë të datës 30.01.2023 është vendosur zëvendësimi i prokurorit Klodjan Braho, me kërkesë të këtij të fundit”, thuhet mes të tjerash në njoftimin e SPAK.
Prokuroria e Posaçme shton se kundërshton çdo tentativë për intimidim dhe sulme personale ndaj prokurorëve të posaçëm që sipas saj, synon t’i kufizojë ata nga kompetenca dhe përgjegjësia e tyre për të ushtruar ndjekjen penale sipas Kushtetutës dhe ligjit.
“Cilido që ka pretendime për veprimtarinë proçedurale të prokurorëve të posaçëm ka mundësinë që t’i referojë ato në organet kompetente, në Inspektoriatin e Lartë të Drejtësisë apo edhe në organet e ndjekjes penale, autoritete të cilat ligji iu ka njohur kompetencën për të verifikuar dhe për të kontrolluar punën e prokurorëve të posaçëm”, përfundon SPAK.
Ndërkohë, ish-zëvendëskryeministrit Ahmetajt i është sekuestruar dokumentacioni i pasurive të tij, si dhe pronave të partneres aktuale dhe ish-bashkëshortes.
