Komisioni Qendror i Zgjedhjeve u mblodh këtë të enjte për të vendosur mbi kërkesat për regjistrim në zgjedhje të 7 partive politike, ku Partia Demokratike u paraqit me kërkesën e firmosur nga kreu i saj Sali Berisha, por edhe me një kërkesë të grupit “Alibeaj” që mban firmën e Lulzim Bashës.
Pasi rrëzoi Berishën dhe njohu Bashën si kryetar i PD, kreu i KQZ Ilirjan Celibashi hodhi dyshime se autorizimi i firmosur para dorëheqjes së Bashës që i lë në dorë partinë Enkelejd Alibeajt dhe Gazmend Bardhit është i falsifikuar dhe në shkelje të ligjit.
Celibashi e konsideroi gjithashtu dokumentacionin e paraqitur nga përfaqësuesi ligjor i grupit “Alibeaj” si të pa plotë dhe i dha 48 orë kohë Indrit Sefës që t’a plotësojë atë dhe të qartësojnë çështjen e “Autorizimit” të lëshuar një vit më parë nga kryetari i dorëhequr i Partisë Demokratike, para se të vendosë për regjistrimin e PD-së në zgjedhjet e 14 majit.
Pikëpyetja tashmë për grupin e pakicës brenda Partisë Demokratike vijon të mbetet e njëjta-ku do ta gjejnë “Autorizimin” me firmën e Lulzim Bashës, që është dorëhequr?!
Duket se një përgjigje për këtë e ka dhënë deputeti Gazment Bardhi, i cili në një postim në Tëitter konfirmon se nuk do ta plotësojnë dokumentacionin siç kërkoi Celibashi pasi grupi “Alibeaj” është i bindur se i ka të gjithë letrat në rregull.
“PD ka dorëzuar dokumentacionin e plotë ligjor për regjistrim. Deklaratat e sotme politike të KQZ nuk kanë asnjë lidhje me ligjin, por janë formalizim i një vullneti politik ekstraligjor. Nuk do të ketë asnjë plotësim dokumentacioni sa kohë ai është dorëzuar i plotë!”, shkruan Bardhi.
