Turqia vijon të goditet nga post-tërmete edhe pas dy lëkundjeve të frikshme sizmike prej 7.6 dhe 7.8 ballë që shkaktuan mbi 45 mijë viktima dhe shkatërruan 11 provinca, një muaj më parë.
Ditën e djeshme, pas tërmetit me magnitudë 4.5 ballë që ndodhi në Kahramanmara në orën 12.40 të mesditës, edhe në Kayseri u regjistruan 3 lëkundje nga ora 14:47 deri në 14:53, dhe ato varionin nga 4.7 deri në 4.3 ballë.
Referuar lëkundjeve të post-tërmetit, sizmiologu turk Prof. Dr. Naci Görür bëri një vlerësim për situatën në vend, ndërsa paralajmëroi qytetarët e disa zonave për të qenë vigjilentë ndaj cdo situate.
Me anë të një postimi në rrjetet sociale, Görür thotë se: “Ka pasur pasgoditje me magnitudë 4.9 dhe 4.2 në Saraycncesu/Kayseri. Ky tërmet është brenda zonës së thyerjes së Ecemi me aktivitet të ulët. Kjo zonë shtrihet në Mersin dhe është 730 km e gjatë. Kjo thyerje ka prodhuar tërmete të mëdha në të kaluarën në vitet 1414, 1717 dhe 1835”.
Sipas profesorit turk, tërmetet e fundit në Mara? dhe Gaziantep kanë shkaktuar ndryshime të fushës së stresit në sistemet e thyerjeve aktive të Pllakës së Anadollit afër rajonit, duke shkaktuar ndoshta thyerjen e disa segmenteve.
“Prandaj, tërmete të tilla mund të priten në rajonet Erzincan-Karlova, Malatya, Adana, Kayseri dhe Sivas. Po ju shkruaj për t’ju informuar. Përndryshe nuk po them ‘do të ketë një tërmet të madh, do të ndodhë në këtë kohë’ etj. Pritshmëria ime është që do të ketë tërmete kryesisht të vogla”, u shpreh Naci Görür.
