Në mbledhjen e Këshillit të Ministrave këtë të mërkurë, qeveria ka miratuar ndihmën prej 1 milionë euro që ishte paralajmëruar se Shqipëria do t’i dhuronte Turqisë pas dy tërmeteve që shkatërruan thuajse plotësisht 11 provinca në kufi me Sirinë.
Vendimi për donacionin 1 milion eurove nga qeveria shqiptare, në ndihmë të familjeve të prekura nga tërmeti në Turqi, u bë me dije nga kryeministri Rama gjatë një bisede telefonike me një televizion turk.
Në emisionin dedikuar mbledhjes së donacioneve për tërmetin, Rama tha se në emër të shqiptarëve do të dhurohet kjo shumë e konsiderueshme parash, për të ndihmuar sadopak në zonat e goditura më rëndë.
Në fjalën e tij shefi i qeverisë tha se Shqipëria nuk e harron ndihmën e dhënë nga Ankaraja kur u prek nga tërmeti i vitit 2019, teksa ekipet e shpëtimit turk mbërritën ndër të parët në Thumanë dhe Durrës, për të nxjerrë të gjallë prej rrënojave dhjetëra qytetarë.
“Nuk do të harrojmë çfarë bëri presidenti Erdogan për vendin tonë në tërmetin e 2019. Ne do të jemi me popullin turk. Ne si popull shqiptar duam të dhurojmë 1 milion euro”, tha Rama dhe tashmë vendimi pritet të botohet në Fletoren Zyrtare.
