Ministrja e Financave dhe Ekonomisë, Delina Ibrahimaj, pas mbledhjes së qeverisë, deklaroi se pensionistët nuk do të mund të përfitojnë shpërblimin e premtuar për pensionistët në muajin prill.
A do të ketë shpërblime në muajin Prill për pensionistët apo grupet e tjera në nevojë ashtu siç është paralajmëruar më herët si pjesë e Pakos së Madhe që është nisur në muajin Janar?
“Në fakt kemi parashikuar në buxhet për këtë vit një fond i cili i dedikohet mbështetjes sociale. Po punojmë intensivisht për rritjen e pagave dhe do të synojmë që paga të rriten gjatë vitit jo vetëm për punonjësit e administratës, por edhe sektorit privat. Një hap që morëm ishte rritja e pagës minimale. Do ketë impakt jo vetëm në pagat e pagamarrësve minimalë, por në gjithë strukturën e pagave.
Sa i përket pensioneve kemi një politikë që tashmë është e konsoliduar për indeksimin në bazë të inflacionit. Pensionet gjatë vitit të kaluar u indeksuan dy herë. Ne do të vijojmë me politikën e indeksimit të pensioneve me qëllim që të gjithë efektet e krizës dhe çmimeve të shtuara prej inflacionit të luftës të mos kenë ndikim në pensionet e pensionistëve. Për momentin nuk kemi përcaktuar një politikë të dhënies së shpërblimi të menjëhershëm në muajin Prill.”- u përgjigj Ibrahimaj.
Kryeministri Rama bëri të ditur në janar të këtij viti se do të programojnë një tjetër bonus për pensionistët për të ulur sadopak barrën e inflacionit, por duket se e ka harruar.
Ndërkohë, çmimet e larta të produkteve ushqimore rriten çdo ditë e më shumë dhe mbijetesa për pensionistët po bëhet akoma dhe më e vështirë pasi, pensioni i tyre nuk mjafton as për ilaçet.
“Të gjithë pensionistët po marrin këto ditë sipas premtimit bonusin e Pakos së Madhe dhe urojmë ta kenë sa më të mbarë e me shëndet të plotë, vitin që sapo ka nisur. Me marrjen e këstit të parë të taksës së jashtëzakonshme mbi eksportuesit e energjisë në muajin prill, do të programojmë një tjetër bonus për pensionistët, që barra e inflacioni i luftës për ta të vazhdojë të jetë sa më pak e ndjeshme”, shkruante Rama në rrjete sociale.
