Në Gjykatën e Posaçme nisi në orën 13:00 seanca gjyqësore paraprake për çështjen e tragjedisë së Gërdecit, ku SPAK kërkon që ish-ministri i Mbrojtjes Fatmir Mediu të gjykohet për akuzat e “shpërdorimit të detyrës” dhe “shpërdorimit të detyrës në bashkëpunim me kuadër komandues ushtarak”.
Seanca paraprake u drejtua nga gjyqtarja Irena Gjoka, e cila do të duhej të vendoste nëse dosja do të kalonte për gjykim apo do t’i kthehet SPAK-ut për plotësim hetimesh, por vendimi që u mor ishte shtyrja e gjyqit për në datën 23 mars.
Në sallën e gjyqit mungoi Mediu, i cili përfaqësohej nga avokatët e tij. Ndërkohë në krah të avokatit u paraqit në seancë Zamira Durda, e cila humbi të birin 7 vjeçar në ngjarjen e Gërdecit dhe kallëzoi në SPAK ish-ministrin duke çuar në rihapjen e hetimeve.
“Thjesht kërkoj drejtësi. Të vendoset drejtësia dhe të më japi një përgjigje pse djali im nuk jeton. Për mua nuk është një akuzë e mjaftueshme dhe duhet shpërdorim detyre me vrasjen e një apo dy personave. Këtë kam kërkuar që ky të hetohet me të njëjtat prova dhe të marri o fajësi o pafajësi”, tha Zamira Durda për mediat pasi u mor vendimi për shtyrjen e seancës.
SPAK kërkoi rigjykimin e Mediut, pasi e akuzon si një nga ish zyrtarët përgjegjës për tragjedinë e Gërdecit, me 26 të vrarë dhe qindra të plagosur. Gjykata e Lartë vendosi t’ia dërgojë këtë çështje për kompetencë GJKKO-së, me arsyetimin se me ndryshimet e fundit ligjore në kuadër të reformës në drejtësi, i takon asaj ta shqyrtojë dosjen penale ndaj ish-zyrtarit të lartë.
Apeli i GJKKO vendosi hapjen e çështjes duke marrë të pandehur ish-ministrin. Ndërkohë Mediu ka dorëzuar rekursin në Gjykatën e Lartë ku kundërshton vendimin e Gjykatës së Apelit të Posaçëm duke pretenduar se vendimi i Apelit është antikushtetues.
Sipas avokatëve të tij, ky vendim cenon parimin e gjësë së gjykuar, sa kohë një kërkesë për rigjykim është rrëzuar më herët nga Gjykata e Tiranës dhe Apeli i saj.
