“Vulën e do prej Ramës dhe votat prej Berishës”. Kështu është shprehur sot në një deklaratë për mediat kryetari i Këshillit Kombëtar të PD-së, Edi Paloka, teksa u pyet nga gazetarët nëse do të negociojnë për një marrëveshje me grupin e Enkelejd Alibeajt.
Deputeti demokrat ashtu siç bëri Sali Berisha mbrëmjen e djeshme në “Opinion”, e ka hedhur poshtë ftesën e Alibeajt për të dalë me kandidatë të përbashkët në zgjedhjet e 14 majit, duke thënë se “Alibeaj nuk i njihte ‘Primaret’ dhe ftesa për bashkëpunim është vazhdimi i hipokrizisë e lojës së Ramës”.
“Që kur del nga goja e Alibashëve nënkuptohet që është thjesht hipokrizi dhe koha e ka provuar këtë, vulën ua jep Rama. Janë hapur bashkëpunëtorë të Ramës dhe tani partitë propozojnë bashkëpunim me PD. E gjithë kjo është pjesë e lojës së Ramës për të shkatërruar PD dhe opozitën shqiptarë, këta janë bashkëpunëtorë dhe shërbëtorë të Ramës në këtë lojë. Si papritur këta pranojnë kandidatët e primares dhe kur bëheshin negociatat nuk i njihnin primaret. Është hipokrizi për ta dëmtuar PD në zgjedhje për të cilat tentuan ta linin jashtë në zgjedhje”, u shpreh Paloka.
Më tej ai nënvizoi se PD do të hyjë në zgjedhje në koalicion me partitë që ka marrëveshje, PL dhe PBDNJ, por po bisedohet edhe me parti të tjera.
“Janë të gjitha partitë që kemi pasur koalicion, po bisedohet edhe me partitë e tjera të koalicionit. Sipas formulës që ka Kodi zgjedhor do të duhet të gjejmë formulën optimale për koalicionin”, tha ai.
