Myrto Uzuni vazhdon të shënojë dhe të mahnitë në Spanjë ku të gjithë e pranojnë se nuk e prisnin rritjen dhe rendimentin e pabesueshëm të sulmuesit shqiptar. Ai po shënon me rregullsi dhe kur jemi ende në fillimin e muajit mars, ka regjistruar deri tani 18 gola në një sezon në La Liga 2.
Elozhet për të nuk kanë fund dhe për të kuptuar se sa vlerësohet Uzuni, mjafton të lexosh komentin e prestigjiozes sportive spanjolle “AS” rreth sulmuesit shqiptar për ndeshjen ndaj Burgos ku ai tundi rrjetën për herë të 18.
“Shkëndija e Shqipërisë arriti në “El Plantío” me 17 gola në 32 gjuajtje në portë. Zero gjuajtje në pjesën e parë. Në minutën e 84-t, përfitoi nga mundësia e tij e parë për të shënuar. Kështu janë gjenitë”, shkruan “AS” në komentin e saj rreth Uzunit.
Dhe me të drejtë, Uzunit iu desh vetëm një mundësi për të tundur rrjetën në këtë ndeshje që nuk ishte nga më të mirat e tij në aspektin personal, pasi nuk kishte shumë kontakt me topin apo rendiment në aksionet sulmuese, siç shihet nga statistikat e përpiluara nga SOFASCORE që e vlerëson me notën 6,9.
