Me ironi therëse dhe një deklaratë të fortë, Ilir Meta nga Vora i ka treguar kryeministrit Edi Rama “mënyrën” sesi mund ta përdorë vulën, të cilën sipas kreut të Partisë së Lirisë, e fitoi pikërisht ai me vendim personal ditën e djeshme në Gjykatën e Apelit.
Sipas Metës gjyqi për të vendosur se kujt i përket Vula e PD dhe logoje e kësaj force politike tregon se Edi Rama është i trembur përballë opozitës, duke marrë në konsideratë faktin se do të humbë në zgjedhjet e 14 majit.
“Asnjë shqetësim për vulën. Edi t’i gjejë vendin dhe ta fusë ku i shijon më shumë!”, u shpreh në mënyrë tallëse Meta, teksa theksoi nga një takim në Vorë se qytetarët duhet të jenë bashkë në 14 maj për të sjellë ndryshimin që i duhet vendit.
“Ky do të paguajë që askush të mos guxojë në të ardhmen të shkelë ligjin, demokracinë dhe të cënojë të ardhmen e vendit. Na jepni fuqi që t’ju japim llogari, fuqia është vota, nuk themi që do të bëjmë mrekulli, por buxheti i taksave tuaja do të jetë transaparent. Mundësitë për Vorën janë shumë të mëdha sepse Vora është parajsë, është zona më e madhe industriale dhe me pak punë për të tërheque investitorë serioz, do të ketë ndryshime të mëdha”, shtoi më tej kreu i PL.
Gjatë këtij takimi Meta tha gjithashtu se Vora është lënë pas dorë nga qeveria e Rilindjes, pasi sipas tij i vetmi qëllim i kryeministrit Edi Rama është të grabisë dhe jo të punojë për qytetarët.
“Ndryshimi është një nevojë ulëritëse. Vora është në një situatë dëshpëruese. pas 11 vitesh qeverisje të Ramës dhe pas 4 vitesh të një monizmi vendor. Në katër vite , katër kryetarë ka ndërruar Rilindja në Vorë. Mbi 50 % e administratës në Vorë, nuk kanë lidhje me komunitetit, por vijnë për të marrë rrogën dhe për të bërë qokën për partinë e Rilindjes. Duhet të investohej në shërbim të komunitetit të infrastrukturës. 12 mln euro shkojnë në xhepin e Ramës dhe jo për infrastrukturën. Me të gjitha ata që janë prekur nga tërmeti është luajtur tragjedi”, deklaroi Meta.
