Seanca gjyqësore e nisur që prej orës 11:00 në Gjykatën e Apelit, ku trupa gjyqësore shqyrtoi ankimimin e grupit të Alibeajt, i cili kërkon rrëzimin e vendimit të gjyqtarit Agron Zhukri për njohjen e Kuvendit të Berishës të 11 dhjetorit 2021 si legjitim, zgjati për më shumë se 6 orë.
Trupa e togave të zeza në orën 16:30 u tërhoq për të marrë vendimin në lidhje me vulën e Partisë Demokratike, nëse do të qëndrojë në duart e Enkelejd Alibeajt apo do t’i kalojë kryedemokratit Sali Berisha dhe prej më shumë se 2 orësh vijon të mbajë në ankth demokratët dhe opinionin publik.
Grupi i Alibeajt përfaqësohej në seancë nga avokati Indrit Sefa dhe Rezart Kthupi, ndërsa përfaqësues nga Partia Demokratike ishte Ivi Kaso, i cili shoqërohej nga Oerd Bylykbashi dhe Ledina Mandia.
Në përfundim të seancës, përfaqësuesi ligjor i grupit Alibea, Indrit Sefa ripërsëriti kërkesën drejtuar trupit gjykues për të rrëzuar vendimin e gjyqtarit Agron Zhukri, ose prishjen e vendimit dhe kthimin në shkallë të parë me një tjetër trup gjykues.
Ndërkoha, nga PD-ja zyrtare, Ivi Kaso kërkoi mosnjohjen e ankimimit të palës tjetër, dhe rrëzimit e kësaj kërkese.
DISKUTIMI
Ivi Kaso: Nuk mund të ngrihen argumente të reja e pretendime të reja vetëm 2 ditë para vendimit.
Kthupi: A është komisioni i rithemelimit funksional. Nëse jo, kur ka mbaruar.
Ivi Kaso: Kolegu të lexojë Statutin.
Sefa: Sa anëtarë ka lista e nxjerrë nga sistemi, blu sistem?
Ivi Kaso: Nuk ka asnjë kërkesë padi që të ishim në gjyq. Pala vetë e tha që nuk ishim as palë e as pjesë e procesit. Sdua debat, kur ata nuk janë as palë e as pjesë e procesit.
Sefa: Kush ishte grupi nismëtar që mblodhi firmat?
Gjyqtari Kalaja: Këto janë shkaqe të ankimit.
Sefa: Kërkojmë prishejn e vendimi të 25.3 dhe kthim për gjykim
Kaso: Ne kërkojmë dhe vlerësojmë se pala nuk legjitimohet dhe nuk është përfaqësuese e një pale që të bëjë ankimim. Duam mospranim të ankimimi. Kërkojmë rrëzimin e ankimimit. Nëse nuk do rrëzohej do ishte oguri më i keq i gjykatës lidhur me partitë politike
Kaso: Kjo do të legjitimonte që cilido i pakënaqur në partitë politike, i palegjitimuar mjafton me një kërkesë dhe kështu do te zvarriste çdo akt.
Vendimet e shkallës së parë
Çështja shkoi në Apel pasi gjyqtarja e Tiranës Blerina Muça, në 22 Prill 2022, pranoi ankimin e bërë nga Enkelejd Alibeaj lidhur me çështjen e njohjes së Kuvendit të PD-së zhvilluar më 11 Dhjetor dhe vendimet e marra aty.
Më 25 mars të vitit të kaluar, gjyqtari i Tiranës Agron Zhukri njohu Kuvendin e zhvilluar në “Air Albania” që vendosi shkarkimin e Bashës si kryetar i PD dhe marrjen e drejtimit të partisë nga “Komisioni i Rithemelimit”. Vendimi u ankimua nga Alibeaj, i cili e konsideroi të jashtëligjshëm vendimin e gjyqtarit Zhukri.
Pala tjetër ndërkohë, ka quajtur të jashtëligjshëm vendimin e gjyqtares Blerina Muça. Kryetari i PD-së Sali Berisha është shprehur në mënyrë të përsëritur gjatë deklaratave publike se ankimi nuk duhet të pranohej, pasi pala që e ka bërë, nuk ka qenë palë në proces. Ai po ashtu ka hedhur akuza ndaj kryeministrit Edi Rama dhe ambasadores amerikane Yuri Kim, për ndërhyrje në këtë proces në dëm të Partisë Demokratike.
