Policia e Fushë-Krujës ka reaguar pak minuta pasi fshati Arrameras u trondit nga një shpërthim i fuqishëm me tritol.
Lënda plasëse ishte vendosur në pjesën e pasme të një mobileri në pronësi të shtetasit Desar Çangu, por ndërtesa ishte në pronësi të vjehrrit të tij Bujar Caraci (banor i zonës).
“Rreth orës 20:40, në aksin rrugor kryesor “Fushë Krujë-Tiranë”, në fshatin Arrameras, në ambientet e jashtme të një ndërtese (mobileri) të marrë me qira nga shtetasi D. C., banues në fshatin Larushk, Fushë Krujë, ka shpërthyer një sasi lënde plasëse, duke shkaktuar dëme të shumta materiale”, sqarojnë uniformat blu.
Menjëherë në vendngjarje kanë shkuar shërbimet e Policisë të cilat vijojnë kontrollet në zonë, për kapjen e autorit/ëve.
Në vendngjarje ndodhen edhe drejtuesit vendorë të Policisë dhe grupi hetimor dhe në drejtimin e Prokurorisë, ndërsa vijon puna për zbardhjen e plotë të rrethanave të ngjarjes.
Si pasojë e shpërthimit, mësohet se ka patur vetëm dëme materiale, ku siç shihet dhe në pamjet e mëposhtme kanë qenë të shumta, me biznesin që është shkatërruar thuajse plotësisht nga eksplozivi dhe xhamat kanë përfunduar deri në rrugën kryesore.