Kreu i grupit parlamentar të PS, Taulant Balla, ka paditur për shpifje kreun e PD, Sali Berisha dhe zëdhënësen, demokrate Floriana Garo për shpifje.
Në një prononcim për gazetarët, Balla është shprehur i bindur se do e fitojë gjyqin ndaj kryedemokratit Sali Berisha, i cili ka hedhur akuza në parlament duke përmendur emrin e Ballës në vrasjen e avokatit Ravik Gurra.
“Shpifja është një vepër penale që duhet ndëshkuar. Edhe me Bashën kam arritur ta fitoj gjyqin për shpifje do fitoj dhe me Berishën. Thirrja ime nga GJKKO është që Berisha duhet të mësohet të vijë për çështjet që e kemi thirrur ne por edhe për çështjen që e kanë thirrur shqiptarët, ndër to 21 janari, Gërdeci, privatizimi i OSSH, privatizimi i kompleksit Partizani. Berisha duhet të bëhet gati që të jetë klient i përhershëm. Kam bërë padi për disa akuza të paqena në Kuvendin e Shqipërisë”, tha Balla për gazetarër, ndërsa këtë të Premte është thirrur nga GJKKO për të dëshmuar lidhur me kallëzimin që ka bërë.
Nga foltorja e parlamentit, Berisha ka deklaruar në parlament se Balla është i implikuar në vrasjen e avokatit Ravik Gura. E njëjta akuzë është përsëritur nga Garo në dalje për mediat.
“Ke kryer porositje vrasjesh dhe ke fshirë regjistrimet. Bashkë me ty në parlament është hija e të ndjerit Ravik Gurra që të ka kapur në lidhje me bandat dhe e eliminove. Kjo është tronditëse. S’ka vend në botë që nuk e dënon këtë”, është shprehur Berisha.
Akuzat erdhën pas një dëshmie në gjykatë nga Adrian Çapja.
