“A e kalon dot oqeanin”?
Kjo është pyetja që Edi Ramës iu kthye si bumerang pas 4 vitesh në Kuvend, duke i kujtuar 31 janarin 2019 kur ai provokoi Sali Berishën, asokohe deputet të Partisë Demokratike për vizën amerikane.
Këtë herë pyetja iu drejtua vetë Ramës – sërish kryeministër, nga deputeti demokrat Dashnor Sula, teksa më parë i kishte përmendur të 14 pikat ku kreu i ekzekutivit shqiptar përmendet në aktakuzën amerikane për korruptimin e mikut të tij nga FBI, Charles McGonigal.
Duke theksuar se drejtësia amerikane do të flasë për çështjen e ish-zyrtarit të FBI-së, që dyshohet se mori një pagesë prej 225 mijë dollar nga kryeministri shqiptar, përmes ish-agjentit të SHIK-ut, Agron Neza.
Nga foltorja e Kuvendit, Sula pyeti kryeministrin nëse mund të udhëtojë drejt SHBA-ve, pas publikimit të këtij skandali.
“Do flasë drejtësia amerikane dhe sigurisht që drejtësia amerikane nuk e ka me ngut, por jam i bindur që kartoni i kuq iu ka dalë dhe qeverisë suaj edhe kryeministrit. Nga kjo histori, kryeministri ynë, ose do fundoset ose do lartësohet. Unë kam bindjen që i ka ardhur radha edhe kryeministrit. Pyetja ime, siç ia bëri Sali Berishës, Edi Rama. A e kalon dot oqeain kryeministri jonë tashmë, nesër, mbas disa muajsh apo vitesh?”, u shpreh Sula.
“E bëtë qytetar nderi në Tropojë, i shtronit qingja e viça në Kukës, nxitonit kush të kishte më shumë miqësi me të, edhe mazhoranca edhe nga opozita tek tuk. Nuk është FBI e korruptuar as SHBA, por McGonigal, një person. Ju dilni këtu e na tregoni se nuk ka lidhje. Nuk ka shans që drejtësi amerikane nuk ka të drejtë të ngrejë akuzë nga Ramës, ka dy rrugë, ose Rama të heqë dorë nga imuniteti, ose të merret në hetim nga SPAK.
Përgjegjësi morale e politike Rama ka, të gjithë dolët këtu e thanë organet lgjzbatuese kanë përgjegjësi për krimet e ndodhura dje. Po Rama nuk paska faj, që i rruajti lekët shqiptarëve, dhe mirë ja bëri. Rama përmendet 14 herë, përse nuk përmenden kryeministrat e tjerë të rajonit? Vetëm ju ju qëllojnë këto gangsterat, deputetë e kryetarë bashkish trafikantë? Pse nuk kapët një burrë të mirë të FBI ta keni mik? Kapni atë të korruptuarin se ai ju pëlqen”, shtoi deputeti demokrat.
