Erdenis Gurishta dhe trajneri Mirel Josa u shfaqën në konferencën e shtypit përpara ndeshjes së Kupës së Shqipërisë me Partizanin. Kapiteni i Vllaznisë, u ndal fillimisht te takimi i humbur në fundjavë kundër Kastriotit duke kërkuar falje për atë disfatë.
“Para se të flas për ndeshjen me Partizanin, e ndjej për detyrë t’i kërkoj falje tifozëve të Vllaznisë, presidencës dhe stafit teknik të ekipit. E them dhe stafit teknik sepse jemi ne ata që luajmë në fushë, jemi ne ata që duhet ta marrim ekipin për dore.
Jemi ne që kur ekipi ndodhet në ditë të vështira duhet ta nxjerrim nga ajo situatë. Kështu që faji më i madh për këtë disfatë është i lojtarëve. Por ajo që ka kaluar, ka kaluar tashmë dhe duhet të shohim përpara. Ne nuk e kemi në dorë ta kthejmë kohën prapa dhe ta luajmë edhe njëherë atë ndeshje.
Por kemi në dorë që në vazhdimësi të rikuperojmë sa më shpejt atë gabim që bëmë dhe mendoj se i kemi të gjitha forcat për ta lënë pas krahëve atë humbje dhe të vazhdojmë rrugën tonë. Ekipi i ka te gjitha mundësitë që të luftojë si në kampionat edhe në Kupë”.
