Shqetësimi kryesor që qytetarët e Tiranës i drejtojnë kandidatit për kryebashkiak Belind Këlliçi, gjatë takimeve në rrugët e kryeqytetit është mungesa e ujit të pijshëm, që është premtuar në dy fushata elektorale radhazi nga kryetari aktual Erion Veliaj se do të rrjedhë pa ndërprerje 24 orë në rubineta.
Qytetarët e Tiranës gjithashtu detyrohen të paguajnë fatura të kripura (të fryra edhe me taska të panevojshme) për ujin që rrjedh në çezmat e tyre, ndërkohë që detyrohen të blejnë ujë të ambalazhuar për të konsumuar në përditshmëri.
Referuar këtij shqetësimi, një qytetar që Këlliçi takoi në rrugët e Tiranës u shpreh: “Kryetari i bashkisë duhet të ketë parasysh një gjë, çmimin e ujit. Ne po e paguajmë shumë shtrenjtë ujin dhe e paguajmë dy herë, por nuk na vjen uji i pijshëm në rubinet. Ne e paguajmë 60 mijë lekë ujin se unë blej edhe bidonin e ujit të pijshëm. Meqenëse uji nuk më vjen i pijshëm në rubinet unë detyrohem të blej bidonin. Pra ky nuk është 35 mijë lekë më. Është 65 mijë. Ti nuk ma sjell ujin e pijshëm, por taksën ma merr. Gjithë Tirana blen me bidona“.
Një tjetër banor i kryeqytetit thotë se kosto e ujit rritet edhe për shkak të energjisë së harxhuar nga pompat e ujit.
“Është pallat 11-katësh, imagjino. Ujë tek ne s’ka“, tha ai.
Ndërsa një tjetër banor thekson se nga mungesa e depozitës, ujin e pret të vijë dy herë në ditë nga një orë.
“Në njësinë 9, në pjesën veriore uji ndalon gjithmonë në orën 10 të darkës, vjen gjithmonë në orën 5 të mëngjesit. Absolutisht asnjëherë nuk ka qenë i pijshëm, në asnjë moment“, rrëfeu një tjetër banor.
Ndërkohë një tjetër kryeqytetas shpërtheu kundër kryebashkiakut Veliaj duke e quajtur halabak, për të gjitha faturat e fryra të ujit që mbërrijnë në dyert e qytetarëve edhe pse është i pakonsumueshëm.
“Ai më jep mua ujë të papijshëm. Ujin unë e blej edhe vjen më fut 84 mijë lekë ujë. Ç’është ky? Ç’është ky halabak mo?“, u shpreh i indinjuar ai.
Çmimi i ujit në Tiranë është rritur ndjeshëm që kur Erjon Veliaj u vendos në krye të Bashkisë, pasi familjarët që jetojnë në kryeqytet paguajnë 65 lekë/m3.
Vit pas viti, Veliaj ka premtuar ujë të pijshëm dhe furnizim pa ndërprerje, por premtimet kanë rezultuar gënjeshtra dhe ende në vitin 2023, qytetarët detyrohen ta blejnë ujin duke u kushtuar dyfish në fund të muajit.
