Policia ka përgënjeshtruar veten e saj ku fillimisht bënte me dije se nga aksidenti masiv në zonën e njohur si “Shallvaret” kishin mbetur të lënduar vetëm 3 qytetarë.
Autobusi i linjës së unazës së vogël ka marrë përpara me dhjetëra automjete, nga fuoristrada te makinat e vogla, duke shkaktuar panik dhe lënë dhjetëra persona të plagosur. Njerëzit janë në rrugë, duke u dhënë ujë të plagosurve dhe duke u përpjekur t’i qetësojnë. Pas raportimit në mediat për dhjetëra të plagosur, policia ka dalë me një njoftim të dytë duke rritur edhe numrin e të plagosurve, sipas tyre, 9 qytetarë janë transportuar në spital me ambulancë.
Gazetarja e “Boldnews.al” nga vendi i ngjarjes raporton një kaos të vërtetë pasi janë mbi 10 makina të përfshira në këtë aksident të frikshëm kurse dhjetëra qytetarë janë plagosur. Mes të plagosurve ka burra, gra, të moshuar, madje edhe fëmijë që ishin duke udhëtuar me autobusin e unazës.
Të shumë kanë qenë qytetarët që nuk kanë pranuar të dërgohen në spital për shkak të dëmtimeve të lehta në fytyrë dhe trup. Gjithashtu policia bën me dije se pas testit shoferi i urbanit nuk ishte nën efektin e alkoolit.
Njoftimi i policisë:
“Në vijim të informacionit paraprak të dhënë pak minuta më parë, ku rreth orës 11:35, në vendin e quajtur “Ura e Tajvanit”, një autobus i linjës së Unazës është përplasur me disa automjete, ju sqarojmë se:
Si pasojë janë dëmtuar shtetasit: A. Xh., 63 vjeç, (drejtuesi i autobusit), M. S., 35 vjeçe; G. P., 27 vjeç dhe V. P., 27 vjeç; O. G., 52 vjeç dhe J. C., 31 vjeçe, D. N., 27 vjeç, K. A., dhe E. H., të cilët ndodhen nën kujdesin e mjekëve.
Pas testit të alkoolit, drejtuesi i autobusit nuk ka rezultuar nën efektin e pijeve alkoolike.
Në vendngjarje ndodhen shërbimet e ambulancës dhe shërbimet e Policisë.
Grupi hetimor po punon për zbardhjen e rrethanave të aksidentit”
Pamjet e publikuara nga “Boldnews.al” prej vendit të ngjarjes:
