“Ta lëmë Gjykatën të flasë”, është përgjigjia e kreut të Grupit Parlamentar të PS, Taulant Balla, kur pyetet në lidhje me deklaratën e ish-ministrit të Financave, Arben Ahmetaj në “Opinion” ku i dërgoi një mesazh kryeministrit duke thënë: “Edi Rama të mos bëjë gjyqtarin”.
“Unë Edi Ramës nuk i kam kërkuar asnjëherë ndihmë. S’do doja të isha në rolin e kryeministrit. Ai për sugjerim, të bëjë atë që bën më mirë. Gjykatësi është pak i sikletshëm”, deklaroi ish-ministri teksa komentonte akuzat për përfshirjen e tij në aferën e inceneratorëve.
Por, për Taulant Ballën tashmë i takon drejtësisë të flasë dhe ai refuzoi që të komentonte fjalët e drejtëpërdrejta të ish-zv/kryeministrit.
I ftuar në një lidhje me Skype për “Milori Live”, Taulant Balla tha se çështja e inceneratorëve po hetohet dhe fjala i takon vetëm Gjykatës dhe se ai nuk komenton asnjë koleg.
“Unë nuk kam komente mbi copëza bisedash apo komunikimesh dhe nuk e bëj këtë për asnjë koleg tonin, sepse në fund të fundit jam kryetar i grupit parlamentar të Partisë Socialiste, duhet të kuptoni gjithmonë sepse e dëgjoj shpesh këtë historinë jo Inceneratorët…Opinioni ynë është shprehur dhe votuar në Kuvend, unë mendoj se sa kohë secili prej nesh e ka votuar me kartonin jeshil raportit e komisionit hetimor për hetimin e çështjes, unë mendoj se e ka aty. Qoftë impianti në Fier, qoftë ai në Elbasan janë dy vepra të domosdoshme për të dyja rajonet për trajtimin e mbetjeve”, tha Balla.
Duke mbrojtur inceneratorët si vepra për të mirën e qytetarëve edhe pse konceionarët janë të gjithë të shpallur në kërkim ndërkombëtar dhe ish-ministri i Mjedisit e një deputet i PS ndodhen pas hekurave, Balla tha se “ata që kanë ngjyer” turinjtë në aferë do t’i gjykojë drejtësia.
“Unë nuk merrem me thashetheme, kjo është një çështje që prokuroria ka hetuar dhe për të dyja rastet që përmenda, që janë vepra shumë të mira pavarësisht se kush ka ngjyer turinjtë apo gishtat në të do të marrë përgjegjësi para ligjit”, u shpreh Balla.
