Një ditë pasi Gjykata e Posaçme ka vendosur fillimin e gjykimit për dosjen e inceneratorit të Elbasanit, me 10 të pandehur dhe dy kompani nën akuzë, ish-ministri i Financave Arben Ahmetaj, i cili ka përfituar udhëtime dhe prenotime hotelesh nga koncesionari Klodian Zoto, është paraqitur mëse i qetë në Kuvend.
Ahmetaj i veshur sportiv dhe me dosje në dorë ka hyrë në sallën e seancave plenare nga dera e pasme e Kuvendit dhe mëngjesi për të duket tepër i paqtë, teksa SPAK nuk e ka thirrur ende të japë llogari për firmën e tij në kontratën e djegësve.
Ish-zv.kryeministri foli shkurtimisht për gazetaren e “Ora News”. Teksa i hodhi dorën në qafë për të zbutur presionin nga pyetja direkte, Ahmetaj tha se akuzat për të janë të paguara, ndërsa ai vetë nuk ka lidhje me aferën e inceneratorëve.
Me sarkazëm, ish-ministri i Financave u shpreh se i vetmi zhvillim i ri në jetën e tij është humbja e 4 kilogramëve në palestër.
“Mirëmëngjesi. Vendi ka nevojë për normalitet. Forcat politike kanë të drejtën e tyre të protestojnë, por jo në të drejtë të tyre. Çfarë ka ndodhur me mua?! Kam humbur 4 kg në palestër, kjo po ndodh me mua”, u shpreh Ahmetaj.
Por, ish-ministri i Financave nuk u ndal me kaq pasi gjithashtu tha se sot në mbrëmje do t’i përgjigjet akuzave të opozitës në lidhje me aferën e inceneratorëve.
“Sa i përket akuzave duroni sot në darkë do t’i sqaroj. Janë akuza mercenarësh”, tha Ahmetaj.
