Pas rritjes së çmimit të patentës, ka reaguar në mënyrë të menjëhershme Autoriteti i Konkurrencës e cila bën me dije se kjo marrëveshje është e paligjshme pasi cenon interesat e qytetarëve.
Në një deklaratë për mediat, Autoriteti i Konkurrencës bën me dije se ka nisur procedurat për vlerësimin e kësaj marrëveshje “Për mbrojtjen e konkurrencës”.
Duke iu referuar ligji nr. 9121/2003, Autoriteti i Konkurrencës thekson se “ndalohen të gjitha marrëveshjet të cilat kanë si objekt ose si pasojë pengimin, kufizimin ose shtrembërimin e konkurrencës në treg, veçanërisht marrëveshjet që caktojnë në mënyrë të drejtpërdrejtë ose të tërthortë, çmimet e blerjes ose të shitjes, apo çdo kusht tjetër tregtimi”.
Reagimi nga Autoriteti i Konkurrencës:
Autoriteti i Konkurrencës, nisur nga disa shqetësime të bëra publike nga media në lidhje me marrëveshjen ndërmjet Grupeve të interesit përfaqësues të autoshkollave (Shoqata “Kombëtare e Autoshkollave” dhe Shoqata e Autoshkollave “Siguria në rrugë”), Drejtorisë së Përgjithshme të Tatimeve dhe Drejtorisë së Përgjithshme të Shërbimeve të Transportit Rrugor mbi përcaktimin e kostos minimale fiskale (tarifat e pagesës) së përgatitjes për drejtues mjeti, ka nisur procedurat për vlerësimin e kësaj marrëveshje në kuptim të ligjit nr. 9121/2003 “Për mbrojtjen e konkurrencës”.
Ligji nr. 9121/2003 “Për mbrojtjen e konkurrencës” ndalon të gjitha marrëveshjet të cilat kanë si objekt ose si pasojë pengimin, kufizimin ose shtrembërimin e konkurrencës në treg, veçanërisht marrëveshjet që caktojnë në mënyrë të drejtpërdrejtë ose të tërthortë, çmimet e blerjes ose të shitjes, apo çdo kusht tjetër tregtimi.
Autoriteti i Konkurrencës, në zbatim të neneve 69 dhe 70 të ligjit nr. 9121 datë 28.07.2003 “Për Mbrojtjen e Konkurrencës”, vlerëson shkallën e kufizimit ose të pengimit të konkurrencës që rrjedh nga projekt aktet që kanë të bëjnë me: kufizimet sasiore për hyrjen në treg dhe tregtimin; vendosjen e të drejtave ekskluzive ose të të drejtave të veçanta, në zona të caktuara, për ndërmarrje ose për produkte të caktuara; imponimin e praktikave të njëjta në çmime dhe kushtet e shitjes.
Për sa më sipër , Autoriteti i Konkurrencës ka kërkuar informacion nga Drejtoria e Përgjithshme të Tatimeve dhe Drejtoria e Përgjithshme të Shërbimeve të Transportit Rrugor, me qëllim vlerësimin e kufizimeve të mundshme të konkurrencës në tregun përkatës”, njofton Autoriteti i Konkurrencës.
- Blendi Gonxhe dyfishon çmimin e patentës
Drejtori i Përgjithshëm i Shërbimeve të Transportit Rrugor, Blendi Gonxhe fillimisht tha se rritja e çmimit të patentës është një lajm i pavërtetë, por pas dy ditësh e ka pranuar se ky dyfishim i çmimit bëhet me qëllim për të ndërgjegjësuar qytetarët që të kryejnë të plotë kursin e patentës.
Lejet e drejtimit që deri më tani kushtonin rreth 450 mijë lekë të vjetra do të dyfishohen javët e ardhshme. Drejtoria e përgjithshme e Transportit Rrugor ka firmosur marrëveshje me grupet e interesit që përfshin rreth 300 autoshkolla në të gjithë vendin.
Me çmimin e ri që shkon në 850 mijë lekë të vjetra. Vendimi i ri rrit edhe orët e teorisë që shkojnë në 36 seanca, të cilat do të bëhen për 15 ditë. Ndërkohë, seancat praktike që do të zgjasin 40 minuta secila, do të jenë 34 nga 25 që ishin deri më tani.
Dyfishimi i çmimit të patentës ka bërë që qytetarët e shumtë të dynden pranë qendrave shëndetësore duke krijuar radhë të gjata për të marrë dokumentet përkatëse që bëjnë të mundur nisjen e procedurave për pajisjen me lejen e drejtimit.
