Në fjalën e tij para mbledhjes së Grupit Parlamentar të Partisë Demokratike për të dhënë direktivat për protestën e nesërme para Parlamentit, Sali Berisha zbuloi një tjetër emër të rangut të lartë, të përfshirë në aferën McGonigal.
Sipas kryedemokratit, me urdhër të kryeministrit Edi Rama, në takimet e McGonigal në Vjenë, ka shkuar ish-ministrja e Drejtësisë Etilda Gjonaj. Berisha theksoi se kjo është arsyeja që e bën Ramën të ketë frikë nga ngritja e një komisioni hetimor për këtë skandal.
“Dosja shqiptare e Rama-gate apo Rama-McGonigal po bëhet gjithnjë e më e rëndë. Menaxher i saj direkt është Edi Rama. Ai transportonte nga Europa në SHBA, dëshmitarë të rremë apo të vërtetë, që do dëshmonin kundër opozitës në hetimin privat që McGonigal kishte urdhëruar. Prokurorë nga Ministria e Drejtësisë së SHBA i sillte në Vjenë. Ndërkohë Rama, urdhëronte Etilda Gjonin, ministren e Drejtësisë, të ishte pjesë e këtij ansambli në Vjenë. Prandaj Rama ka frikë dhe tmerr nga hetimi, prandaj gënjen kur thotë se nuk ka qenë. I them se ka qenë dhe me asgjë nuk e fsheh dot këtë”, tha ai.
